Friday 2 March 2007

كلب الأمير

  
 يا حسرة قلبي عليك يا مصري
بعد مكنت كريم العنصرين
بقي كل واحد يتحكم فيك
كل جلف كان امبارح بيجري ورا الغنم في الجزيرة العربية
بقي دلوقتي عايش فوق رأسك.يتحكم فيك..و يذلك
يا أخي دول دلوقتي بقوا حتي يأنفوا التعامل مع المصريين
وليه مدام فيه كلاب
حتي الكلاب يا مصري محنتش عليك
وانت من خيبتك كنت زمان بتعبدها...أأأأه يا خايب
كلاب الأمير السعودي عقرت حبيبة بنت سعيد محمد السيد
وايــــــه يعني كتر خيرها انها مموتتهاش
محنا ملناش كرامة ولا دية ولا بلد نسأل علينا
كلب ابن الامير هجم علي البنت وفرتكها
الأب تصالح مع الجاني
تفتكروا ليه؟؟؟؟
وحقولكم كلمتي المشهورة(اوعوا دماغكوا تروح لبعيد)
فيه احتمالات كتيره
1)أهمها طبعا أن أبو البنت خاف علي العلاقات المصرية الخليجية والتي تتميز بالاحترام المتبادل سواء علي مستوي القيادات او علي مستوي الجالية المصرية في الخيليج والتي تتميز عن غيرها من الجاليات في دول الخليج بالاكبار والاحترام الشديد من جانب اهل هذه الدول للمصريين
2) خوف والد الطفلة علي مستقبل الامير الصغير من العقاب علي أساس ان مستقبله حيضيع (اوعوا تفتكروا ان الامير مثلا-اللهم اخزيك يا شيطان- حيلبس أي حد غيره القضيه ويخرج منها زي الشعرة من العجين)
3)قوات امننا الباسلة التي لم تمارس اي ضغوط علي والد الطفلة لانها معروف عنها الشفافية الي الحد الذي يجعلنا لانراها في تجاوزات العائلة المالكة في مصر (يا لهوي علي دماغكوا اللي دايما تروح لبعيد مش قصدي عائلة مبارك قصدي الامراء الخلايجة اللي عايشين في مصر دامغكوا ده حتوديني في ستين داهية الله يسامحكو)
ومن هنا واحقاقا للحق احب اشكر المباحث و قوات امن المطار و قوات نادي الشرطة علي وضعها الامير الصغنون ابن الأمير الكبير علي قوائم الممنوعين من السفر_ زي الامير القطري بتاع سباق العربيات اللي هرب_

وسمعني سلام يبقي انت أكيد في مصر




7 comments:

دماغ ماك said...

بكره محاكمة اسلام نبيه
شوف التفاصيل عندي
سلام
www.demaghmak.blogspot.com

ذو النون المصري said...

انا اول مره ازورك
اعجبتني جدا الصور علي جانب المدونه خاصة صورة الزعيم مصطفي كامل
انا مناشد المحبين له لانه قدوه و نموزج لشباب مصر
تخيل مات و عمره 34 سنه فقط
الشاب انتهي نضاله في عمر34 سنه
تخيل بدا امتي؟؟؟
ممكن تعرفني ازاي احط نفس الصوره عندي؟
انا برضه عاوز اعرف مين الصوره الثالثه
؟
لك تحياتي و امنياتي بالتوفيق

محمد هانئ said...

دماغ ماك شرفتني بالزيارة

محمد هانئ said...

عزيزي ذو النون
بالنسبة للصورة الثالثة فهو الدكتور احمد عبد الله رزه
قائد الحركة الطلابية في السبعينيات التي كانت تهز اركان حكم السادات وتهدد كرسي الحكم بثورة شبابية شاملة من القرن الماضي
كان عاشق لمصر و سافر للخارج ليحصل علي الدكتوراه في الاقتصاد والعلوم السياسية
وعندما عاد لمصر لم يجد الا التجاهل وقام بترشيح نفسه العام الماضي لانتخابات مجلس الشعب ولانه ليس غني حرب يرشي المصوتين في الانتخابات وليس لديه بلطجية اوعضو في الحزب الزطني لم يفز في الانتخابات
قام بعدد من المشروعات البسيطة لخدمة مصر
ولكنه لاقي وجه ربه الكريم العام الماضي وهو لا يزال في خمسينياته



بالنسبة ل الصور فهي بتوضع زي أي صورة في السايد بار بتعمل
add page element then add picture

ولقد ارسلت صورة الزعيم لك
علي المايل الخاص بك
واي استفسار او اي شئ انا في الخدمة يا ذا النون

أحمد عبد الفتاح said...

عزيز المصري افندي
اه المصري مبقاش له كرامه لا اختلف معك
بس اختلف مع اول كلامك لانك فرقت الناس علي اساس عرقي
قلت عالعربي انه بيجري وراء الغنم طب المصرييت حيالله كانوا ايه يعني ؟؟؟ اتولدوا مهندسين كمبيوتر ؟؟؟
كانوا فلاحين
يبقي ملوش لزمه الحتة بتاعه رعاة غنم والاحساس انهم من جنس اقل مننا

محمد هانئ said...

يا عم احمد
مش انا اللي قسمت علي اساس عرقي
اخوانا الخلايجة هما اللي كانوا في جرة وطلعوا لبرة
ثم ايوا المصري هو صاحب واحدة من اكبر الحضارات علي مر التاريخ
والفلاح اللي بتقول عليه اول من اكتشف السنة الزراعية
وله ايادي بيضاء علي الزراعة اللي العام كله بيزرعها دلوقت
انا مقلتش انهم جنس اقل
لكن لازم الاعتراف بالحق
ولا انت مش معترف بحضارة الفراعنة
يا عم احمد ولا ايه
زي ما مصر كانت قبلة للجميع
لازم يشكروا صنيعها
مش يهوينوا ولادها
ولا انت ليك راي تاني يا ابو حميد
وزي مبيقولوا في الاعلان
نورت مدونتي

Anonymous said...

السلام عليكم ورحمة الله وبركاته
كنت فقط اتصفح الانترنت وابحث عن مواضيع تخص احدى الدول المفضلة بالنسبة لي "مصر" فقط اردت القول اني خليجية و متطلعة سطحيا على المشاكل الموجودة في مصر
حقا قلبي معكم وانا احبكم واعلم ان هذا لا يكفي
اتمنى ان تحل كل المشاكل في مصر وباقي الدول العربية :(
لكن ارجو الا يعمم الكلام على كل الخليجيين فانا حقا احب مصر
آسفه على الاطاله