Tuesday, 27 March 2007

حوليات تفصيل الكستور الحلقة الاولي - ابتذاذ بورقة الدين -


صدقت توقعاتنا بالامس وكانت النتيجة 27 في المائة وكسور
علي رغم من سعادتي باني نشرت هذا بالامس الا ان الالم يعتصرني
علي التزوير عيني عينك والفجر البالغ من قبل النظام سواء من شحن الموظفين
او تسويد البطاقات او ملأ الصناديق ما علينا
لكن ما يهمني هو تشريح الموقف ما له وما عليه
ساحاول في الايام القادمة اكمال التغطية بشكل صحفي و بتحليل شخصي
في حوليات تفصيل الكستور
اسف….تعديل الدستور
و لنبدأ بالحرب الدينية المعلنة
ونظرا لان المواطنة تم اقرارها نشوف
اول حاجة هي حرب الاخوان و شيخ الازهر
مجرد تلاعب جماعي بورقة الدين
انتم مالكم بالللي يصوت واللي ميصوتش
مزايدة من الاخر علي الأخر
والناس في المنتصف لعبة يايدي الجميع
بدأت الحرب الدينية المعلنة يوم السبت من قبل شيخ الازهر
والذي لا يحظي بمحبة عدد غير قليل من الشعب المصري
لمواقفة الموالية للنظام
حيث خرجت علينا صحف الحكومة بتصريح فضيلته
(من لا يذهب للاستفتاء كاتم للشهادة….وكاتم الشهادة اثم قلبه)
تصريح لا يليق بشيخ الازهر وامام السنة في العالم
تصريح يثير الضيق
و لكن اعتدنا علي تصريحاته الرائعة التي اذكر منها ما قيل ايام ازمة الرسوم الدنماركية
(الرسول ميت ولا يجوز الحديث عنه هكذا) الي اخره من التصريحات المستفذه
ما علينا…….لم بفت هذا علي الاعلامية الرائعة مني الشاذلي والتي استضافته في حوار
علي الهاتف ليؤكد ما قيل قبل ذلك ولكن نجحت الاعلامية الكبيرة في اسقاطه في الفخ ونجحت في
خطف تصريح اعترف فيه الشيخ الجليل بعدم معرفته بالتعديلات الدستورية و علام سيقترع لكن مادام
مجلس الشعب وافق فخلاص وانه يقترع علي الخطوة لا علي التعديلات لان(محدش بعتهالي)
تصريح قنبلة وفضيحة مدوية لامام السنة في العالم هو لا يختلف عن اي مواطن غلبان لا يعرف القرأة ولكن ذهب ليقترع علي ايه ميعرفش لكن مادام الريس عمل كده لازم نوافق كتر خيره
ولم يمر التصريح علي خير
خرج اخوانا الاخوان ليزيدوا الطين
بله يا اخوان ايه لازمته الانجرار للسكة ده ولا انتم حتعملوا كده لو مسكتم انتم كمان يلا ادينا قاعدين في البلد ده نتفرج
(من يذهب للاستفتاء هو شاهد زور)
يا خبر اسود يعني اللي راح واللي مرحش شايل ذنب
وعلي نفس النغمة جأتني انباء  لم يتسن التأكد منها من مصدر محايد انا الجمعية الشرعية في مصر دخلت علي الخط وقامت بوضع يافطات تاييد للتعديلات  ان صوتوا بنعم
وددت لو اضحك لكنه ضحك كالبكاء علي حال الدين والبلد
طبعا م الاخوان وشيخ الازهر اخدوا توكيل الاسلام في مصر
فضيحة وشئ مقرف خداع باسم الدين لتحقيق المصالح السياسية
طب والمواطن الغلبان اللي يسمع كل ده تفتكروا يعمل ايه
اكيد حيشتم ده وده ويروح ينتخب عشان ياخد علبة الحلاوة بتاعة الحزب الوطني واهو يفرح العيال في مولد النبي
وكله كوم والبابا شنودة كوم
لا اجد افضل من تعبير اخي الحاج جرجس حين شبهه ب(ناظر عزبة الاقباط)
يقول للانفار روحوا يروحوا متروحوش ميرحوش كفاية لعب بالدين حتحرقونا وحتحرقوا انفسكم
مش حتي روحوا انتخبوا يا اقباط لا روحوا قولوا نعم …. بل وهناك اخبار( غير مؤكده) عن ارسال برقية شغل للرئيس
وكما وعدتكم حصريا وفقط علي( في الكلبش) التسجيل الفضيحة لشيخ الازهر
حصريا واتحدي
للـــــــــــتـــــــــــــــــــحـــــــــــــمــــــــــــــــيـــــــــــــــــــــــــــــــــــل

18 comments:

محمود سعيد said...

طبعاً حضرتك كلنا عارفين حكاية
شيخ الأزهر
إنما حكاية الإخوان عاوز أعرف حضرتك منين جيبت الفتوى اللى انت بتتكلم عليها ديه

يعنى ممكن تجيب لنا لينك ليها ؟
(سؤال برىء جداً)

ثم انا برضه مش عارف أفهم من حضرتك
المفروض إيه اللى يحصل
يعنى على أساس أن الدين ملهوش دعوة بالموضوع ده
يعنى علمانية
طيب ..... :-)

بس انا زعلت منك الصراحة
(على إعتبار أن الإخوان قالوا ما نقلت)

إزاى بتساوى بين وبين ....
http://www.islamonline.net/servlet/Satellite?c=ArticleA_C&cid=1173695328530&pagename=Zone-Arabic-Shariah%2FSRALayout

shlapia said...

بصراحة مقدرش الا اقول ,,ربنا يرحمنا ويطلعنا منها على خير
وادينا بنتفرج والفرجة ببلاش ..وياما هيحصل طول ماحنا بنتفرج وبس

المصري افندي said...

اهلا بيك يا محمود
انا مسويتس انا بقول ان فيه لعب بورقة الدين
وده في رايي حقيقةعايز تخليني علماني اقولك يا استاذ محمود انا يميني وتوجهي اسلامي
انت عايز تفرض الدين كطرف في اللعبة وتخلي الناس تنتخب علي حسب فتاويه مش علي حسب مصلحتهم
ولا عايز تجبر الناس علي التصويت او عدم التصويت علي حسب هما بيشجعوا مين الاخوان اللي حضرتك تبعهم ولا شيخ الازهر
و ردا علي سؤال حضرتك البرئ عن اللينك
ادي واحد http://www.islamtoday.net/albasheer/show_news_content.cfm?id=66534
و علي فكرة موقع الاسلام اليوم لهو علماني ولا هو تبع الحكومة ولا يمكن سؤال برئ زي بتاعك
و هو انا عشان مش تبع الاخوان ابقي علماني ولا انتم فعلا اخدتم التوكيل زي ما انا قلت
و طبعا حتقولي ده مش فتوي ده راي
حقولك سكتوا الناس عندكم وخلوها تقول كلام يدخل العقل
متزعلش يا حودة انا رديت علي اسألتك ومستعد ارد علي اللي انت عايزه

المصري افندي said...

اه حودة
نسيت ده لينك تاني من اللي كنت بتسال عليها
http://www.masrawy.com/News/2007/Egypt/Politics/March/25/ikhwan.aspx


علي فكرة يا حودة لو كلام نوابكم حيزعلكم كده كنتم كدبتوه علي موقعكم ولا اقولك احسن ياريت تسكتوا نوابكم اللي بيورطوكم لو انتم حتزعلوا كده
ابقي تعالي تاني
نورتني

محمود سعيد said...

ابتزاز بالزاى على فكرة

انا اتبسطت جداً بأسلوبك المحترم فى الرد
لكن انا لم أتهمك بالعلمانية ولا حاجة
انا فقط مجرد قرأت وحطيت إحتمالين
اما علمانى
وإما (معلش) بتهاجم وخلاص

وانت قلت انك مش علمانى
طيب انا مش فاهم برضه لسه يعنى

يعنى أنت قصدك إستغلال الدين للسياسة
ماشى

طيب خلينا نشوف ازاى
حضرتك جيبت لى لينكات تقارير أخبارية لصحفيين لن أتهمهم بعدم الحياد أو بالتحيز ضد الإخوان
لكن بكل بساطة بقول لحضرتك
الكلام المنقول نفسه ليس فتوى شرعية (فى اللينكات اللى حضرتك نقلتها)
يعنى بتنقل عن الدكتور مرسى (النائب السابق ) قوله أن المقاطعة واجب وطنى ودينى
ديه فتوى ديه (زى بتاعة شيخ الأزهر كده) ، طيب بلاش الدكتور مرسى ده مفتى يعنى مثلاً ....

طيب هو قال كده وبعضمة لسانه وانت بتقول " كلام نوابكم حيزعلكم كده كنتم كدبتوه علي موقعكم "

طيب ده نفسه رد على كلام حضرتك
يعنى موقع إخوان الدقهلية بينقل الندوة محور الخبر اللى انت قلته ومجابش سيرة الفتوى (على أساس أنها فتوى يعنى)
وموقع الإخوان الرسمى برضه مجابش سيرة ولا نقل الفتو ى
وموقع الكتلة البرلمانية الرسمى برضه مجابش سيرة

ولا المفروض بقى الإخوان يسكتوا النواب بتوعهم (زى ما أنت عاوز) ، يعنى لما محمود (اللى هو انا) يقول ان موافق ان جمال مبارك يمسك مصر .
مفروض الإخوان يسكتونى يعنى (أنا حر) والإخوان مش هيسكتونى


إنما أمتى يعتبر رأيى (بتاع جيمى) رأى الجماعة لما تلاقيه اتحط على موقع الجماعة الرسمى ومواقع المحافظات وموقع الكتلة .
ولا مفروض بقى بكرة الاقى المرشد يصرح لإخوان أون لاين : الجماعة ترفض تصريحات محمود (ده اللى هو أنا برضه)

ببساطة رأى الدكتور مرسى وهو حر فيه (وأنا شايف أنها مش فتوى)

هو ده بقى إستغلال الإخوان للدين ..........

المصري افندي said...

كويس انك متابعني يا حودة ولا تزعل لما اقولك كده
انت اختياراتك قاصرة فلا انا علماني زي محضرتك عاوز تخليني ولا بهاجم عشان اهاجم لان انا مش عيل صغير ولا غاوي شهرة
انا صحفي لو كنت بصيت في المدونة بتاعتي
يعني بنقل خبر لو كنت قريتلي حاجة هنا في المدونةفعيب تقول كده والمفروض يكون ردك اكثر لياقة من هذا
تاني حاجة
لما الكلام يطلع من نوابكم اللي في مجلس الشعب يبقي كلام لازم اسمعه وعلق عليه لان ده ناس المفروض سياسين عارفين معني كلامهم مش زيك صغيرين
ثالث حاجة انت اللي قايل فتوي مش انا راجع سؤالك البرئ
رابع حاجة انت باين مقريتش اللي انا بعتهولك اصل
يا اخ اقراه الاول وبعدين رد
انا مقولتش الدكتور مرسي هو اللي قال اللي قال نائب في البرلمان يعني سياسي يعني لما يتكلم انا مش مطالب افضل ادور في مواقعكم عشان اشوف كلامه صح ولا غلط
وانا مش عايز اسكت نوابكم خليهم يتكلموا حد حاشهم
بس متتطلعوش تكدبوهم وتقولوا ده موقف شخصي الكلام ده متقولهوليش تقوله للنواب بتوعكم اللي المفروض بيمثلوا الشعب
ملحوطة يا حودة انا شايفك متابع لو حترد عليا فاعذرني اني مش حرد عليك النهاردة لاني داخل انام ارد بكرة ان كان فيه عمر
علي فكرة اظن ان النواب بتوعكم مش محمود عشان محدش يرد علي تصرحاتهم ويعقب عليها حتي لو استاذ مهدي

سلام عليكم
يا حودة :)

المصري افندي said...

الغالية شلبيه
اتفرجي وادينا بنتفرج لما نشوف اخرتهاايه
وخليهم يلعبوا بالدين ويضحكوا علي الناس
ربنا يهدي العاصي

محمود سعيد said...

برضه لسه سايب ابتذاذ

أولاً أحب أعتذر لأنى لم أقرأ باقى بوستات المدونة لأعرف خلفيتك وعملك ولم أحاول حتى معرفة أسمك لأخاطبك بيه ...

بس انا مستغرب ازاى بتقول صحفى ومش عارف أن الدكتور مرسى ده نائب سابق

المهم على فكرة انا باتكلم بكل هدوء اوعى تكونى فاكرنى زعلان فمتردش عليا إلا بكل هدوء :-)
المهم بقى ان بلاش محمود (أحسن أنا مش عاجبك)

دلوقتى لو قلنا النواب 88 كلهم متفقين على المقاطعة لو طلع واحد قال لأ نشارك ونقل لأ
يبقى النواب ب 87 وواحد راح قال لأ نشارك
وهذا لا يستلزم تصريح من المرشد بعكس كلامه

هو حر
سياسى بارع
ونائب عن الشعب

هتلاقى بقى مثلاً كل الجرايد المولعاتية تانى يوم
تضارب الأنباء حول المشاركة والمقاطعة
إنشقاق فى المش عارف إيه

ولا بقى علشان انت صحفى بتعمل زيهم
سبق وقلت لك الراجل بيعبر عن رأيه
ومن حقه أن يكون له رأيه الخاص حتى لو خالف الجماعة
وهذا لا يستلزم تصريح من المرشد بعكس كلامه



يعنى بالعربى ومن الآخر (قولتها لك وهاقولها تانى) ده رأى اللى قاله هو حر فيه
وأنا لازلت مصر على أن حتى كلام الدكتور مرسى اللى انت معتبره فتوى ده لا هو فتوى ولا هو مفتى ولا أهل للإفتاء ولا هو قال فى أى لينك أنت جيبته أنها فتوى ولا أى حاجة

وأنت بقى اعتبرت إن ده ابتزاز بالدين (مش عارف ازاى ابتزاز مع الابتزاز ده حاجة تانية) وهو كلام نفر (حتى لو نفر كبير)
ثم أرجع لكلامى واعتبرنى انا مش (محمود) انا كبير برضه مش محتاجة رد من الإخوان ولا رد من المرشد هو كل واحد يقول كلمة كبر ولا صغر لازم نتبرأ منها لحسن تلزق فينا ....
:-) :-) :-)

محمود سعيد said...

صحيح

ثم مش كفاية تجاهل

الموقع الرسمى
وموقع الكتلة الرسمى
وموقع الدقهلية الرسمى

علشان توصلك فكرة أن ده رأيه الشخصى

محمود سعيد said...

ثم صحيح
يعنى بإعتبار هذه فتوى برضه

هو الراجل ملهوش حق الأختلاف

يعنى هذا الأمر مش مختلف فيه
يعنى فيه قولان

والقاعدة الفقهية تقول :
" ما إختلاف فيه لا إنكار فيه "

المصري افندي said...

لا اله الا الله
اقول ايه يقلي ايه
يا عم محمود ربنا يكرمك اقرا اللينكات اللي انا باعتها
انا مقلتش الدكتور مرسي قال كده
نائب بتاعكم في البرلمان
اسمه ابراهيم ابو عوف
ربنا يكرمك يا عم اقرا كويس ومتتزكاش عليا
اقرا صح... الدكتور مرسي دعي لتبني المقاطعة ملهوش دعوة بالموضوع
اقرا بهدوء ومتتسرعش
اقرا ردك الاولاني انت اللي قلت فتوي مش انا ايه يا عم محمود انت عايز تهاجمني وخلاص اقرا كلامك قبل ماترد
يا اخاونا نائب في البرلمان طالع يقول... كلام نائب برلمان
يعني مشرع ومسؤول
مش معني ان انتم اكتشفتم انها وسعت منه شوية في الكلام وتجاهلتم كلامه انه متقلش
ثم انت شايفني عصبي
يا راجل ده انا بدلعك واقولك يا حودة
بس مقلتليش برضه مزعلاك حودة ده

المصري افندي said...

ثم حاجة نسيتها معلش
هو انا لما انقل تصريح لواحد منكم ابقي مولعاتي
ولا انا لما نقلت تصريح اشيخ الازهر ابقي مولعاتي
انا بنقل الخبر
زي ما هو
واضح
ولا عشان الموضوع جه فيكم المرة دي ابقي مولعاتي
لما اشوف ان فيه حاجة غلط من وجهة نظري حاقول عليها....ليه...عشان ده مدونتي وحقي اقول عليها اللي انا عايزه طالما لم اتجني علي احد او اشعلل الاخبار زي ما انت بتتهمني
ولا ايه يا اخ حودة

محمود سعيد said...

بقولك انا باتكلم براحة والله

متعصب ليه بس

لا إله إلا الله
انا قلت انت مولعاتى

انا باقول المولعاتى اللى بيقول انشقاق و كلام فاضى (اللى انا كتبته)
مش انت ولا اللى نقل الخبر مجرداً

ثم انا فرضت فرض
وهو ان واحد مش موافق على المقاطعة ده كان فرض


وانا قريت اللينكات كويس جداً وقريت كلام النائب اللى ناقله الموقع كويس جداً

نفس الرد برضه

رأيه وهو حر فيه

إيه المطلوب نعمله يعنى


يعنى انت ازاى بتقول على خبر منقول أن نائب بيقول كذا (والله أعلم بصحته) هو ده رأى الإخوان وبتعامل الإخوان بيه وتقول إبتزاز الإخوان

برضه مبتردش على الكلام
بقولك ده كلام نفر
نفرين
ثلاثة

إيه اللى خلاك تقول أنه رأى الجماعة وبناء عليه بتقول إبتزاز
نائب محترم كويس سياسى مشرع (المشرع هو الله) مسئول أى حاجة تانية
بس له رأيه الخاص اللى هو حر فيه
يبقى الصحيح أنك تقول فى البوست قال النائب ....
مش قال الإخوان


حضرتك فاهمنى

المصري افندي said...

حضرتي فهمك
و كويس انك بتقول قريت الخبر كويس مع انك مكنتش عارف مين اللي قال الكلام ده
ما علينا
انت عاوزني ابان عصبي واتعصب ليه يا حبيبي هو انا بقول حاجة غلط العصبية تكون لضعيف الحجة اللي مش عارف يرد واظن ان ردي عليك واضح بس انت مقرتش او مش عايز تفهمه انت حر
تاني حاجة
متحولش تلعبني بورقة المشرع هو الله لانك مقلتش حاجة جديدة بس حضرتك لو كنت تعرف حاجة في القانون حاجة يعني اسمها القوانين الوضعية و التشريعات كنت عرفت بتكلم عن ايه
ايوة مهمة عضو المجلس مشرع ايه غريبة روح اسال النواب بتوعكم ولو قالولك غير كده يبقي هما في حاجة غير مجلس الشعب
ثالث حاجة ولا انتم داخلين المجلس عشان التمثيل المشرف و تقديم طلبات احاطة وبس لا يا حودة ادرس مهام العضو في المجلس وتعالي اتكلم بعد كده
يا سي حودة قلتلك ان ده واحد مسؤول عن كلامه ولو كان عايز يقول ان ده رايه كان قال و في رايي او رايي الشخصي لكن جنابة مقلش وحضرتك عاوز تطلع كل الصحفيين بيكرهوكم والناس بتكرهكم هو انتم عندكم نظرية المؤامرة غالبة كده الخبر موجود في المصري اليوم ولا ده كمان متعجبش و انا كصحفي بنقل التصريح انتم حاسين ان ده غلط روحوا قلوله مش جي تقولي انا مش مهمتي اشوف التصريح ده فردي ولا جماعي مهمتي انقل الخبر زي ما هو و الا اكون بتجني عليكم
وقلتلك الكلام ده وانت مصر متفهمنيش اعملك ايه
الرأي ده متقلش في بير السلم ولا في خرابة ده اتفال في اجتماع للكتلة البرلمانية لو كنت قريت الخبر يعني ..يعني كان نوابكم موجودين
معترضتوش ليه ولا الديمقراطية عندكم واخده حقها لو كلامه مزعلكم عارضوه مش تيجي تقولي انا ده اسمه في الصحافة لو كنت تسمع عنها تصريح صحفي
خامس حاجة كلمةابتزاز
اللي مزعلاك
اه ابتزاز بالدين ده رايي وانا حر فيه انت ايه اللي مزعلك ولا حتحجر علي رايي كمان وتحاكمني بتهمة العيب في الذات الاخوانية
وياريت يا عم محمودمش انت اللي حتعلمني شغلي و ازاي اكتب الخبر
فهمت ولا قول كمان يا سي حودة

محمود سعيد said...

كثير مما ذكرتك يستحق الرد
وكثير مما قلته على لسانى لم أقله (أو لم أعنه)
إلا أنى لن أخرج عن الموضوع كما خرجت

بس هانقل منك جملة واحدة أعتبرها نهاية للحوار
" يا سي حودة قلتلك ان ده واحد مسؤول عن كلامه "

إسأل النائب صاحب الكلمة عن كلمته
هو وحده المسئول عن كلامه

المصري افندي said...

شرفتني بالحوار
انا مخرجتش عن الموضوع لكن لو انت شايف كده انت حر في رايك
بالنسبة لسؤاله ده حاجة بتاعتك انت تتصل وتسأله ده رايه ولا راي الجماعة
انا للي قصادي تصريح واضح ليا انه راي الجماعة من واحد ممثل للجماعة في اللقاء بتاع الكتلة البرلمانية و في مجلس الشعب وزي ما انت نقلت عني مسؤول عن كلامه
كلمه انت واسأله وابقي قلي قالك ايه
و لو طلع رايه قله يتكلم صح و يقول ان ده رايه الشخصي بدل م الجماعة بتاعبكم تتعك في النص ولا انت ناوي تقاطعني و متخشش تاني
شكرا علي الردود اللطيفة بتاعتك يا حودة
ابقي تعالي تاني

ميدو said...

هو ممكن واحد من السادة المتنورين يتفضل و يشرح لنا النصوص القديمة و النصوص المعدلة ، مع ان الكلام متأخر و الموضوع انتهى بس لسة انا مش فاهم - اصلي عايش برة مصر و مش عارف ليه زمان حشروني في سداد ديون مصر و سددت ضريبة على العاملين في الخارج مقابل تصريح سفر و لما الموضوع يتعلق بالتغير في الدستور ما حدش قال لي انت فين و لا كان العاملين بالخارج دول ليهم اهمية - لو سمحت تشرح لي ايه التغيير اللي شاغل الريس اوى و ايه العائد منه علينا - و من حق هو الريس محتاج قانون جديد علشان يعمل شئ هو عايزه؟؟

المصري افندي said...

سلام عليكم
ازيك يا عم ميدو
ربنا يقويك علي الغربة
الا قبلا انت مسافر فين
المهم يا سيدي
بالنسبة للتعديلات
لو بصينلها من زاوية ايه الجديد
اقولك زي ما كانوا بيقولوا شالوا الدوا جابوا شاهين
المهم التعديلات في ال34 مادة شبه متفق عليها في 32 مادة لانها مبتقلش حاجة جديدة يعني الدستور معمول لبلد اشتراكي
شالوا مثلا كلمة تحالف قوي الشعب العامل وخلوا المواطنة هيا الاساس
فمعظم المواد المعدلة شالوا منها كلمة اشتراكية وحطوا بدلها مواطنة
نيجي لمواد تانية متهمش غير الاخوان
بمعني ان منعوا قيام احزاب علي اساس ديني
فيه مواد قنابل وده اللي الكل معترض عليها
مادة 88
و ده المادة اللي كانت بتدي الحق للقضاة انهم بشرفوا علي الاناخابات كل قاضي علي صندوق...ازاي وده تيجي
خلوا القضاة يشرفوا علي اللجان العامة بس يعني الصاديق اللي عايز يلعب فيها يلعب
وعملوا لجنة عليا للنتخابات
مكونة من شخصيات عامة
منها وزير العدل ووزير الداخلية او ممثله
المادة الكارثة التانية هي 179
وده مادة حيدخلوا فيها قانون الارهاب وده حيخلي حضرتك بيتك يتفتش من غير اذن نيابة و حضرتك يتقبض عليك من غير اذن نيابة بتهمة الارهاب
ولو غلط ونزلت مظاهرة يتقبض عليك وتتحاكم بتهمة ترويع المواطنين
اتمني اكون وضحتلك وطسة التعديل
وربنا يقويك في الغربة
ويقوينا علي ما بلانا
و لو عايز شرح اكثر استفاضة انا جاهز
نورت المدونة يا ميدو