Monday 26 February 2007

الحقوا....قبل م عواد يبيع أرضه




كان في أغنية قديمة في مسلسل أيام زمان اللي محدش يعوي مننا عليها
كان فيها أطفال بيسخورا من عواد اللي باع أرضة
(عواد باع أرضة يا ولاد شوفوا طوله وعرضه)
جريدة المصريون نشرت خبر غريب
عواد بعد مباع ارضه في 48 ومفكرش في ولاده
ودلوقتي بقي بيتسول وطن
عواد جانا بلدنا
المصريون بتقول ان الصهاينة عايزين يشتروا أراضي بمبالغ خياليه
تفتكروا ليه
حزروا فزروا
قلت يمكن النبي سليمان كان بني هنا كمان هيكل...جايز
علي فكرة بيقولوا انهم بيدوروا علي اثار يهوديه
مش بس كده فهم كتر خيرهم بيدورولنا علي قصر فرعون اللي تربي فيه موسي عليه السلام
لدرجة انهم عرضوا شراء قري بأكملها للتنقيب فيها بهدف علمي
أوعوا دماغكوا تروح لبعيد
اللطيف في الموضوع انهم بيعرضوا علي الناس التنقيب في مقابر اهلهم
أي والله الخبر بيقول كده
50 الف يورو ثمن التنقيب في المقابر أو تحتها
أوعوا دماغكوا برضه تروح لبعيد
احسن المصريين دول دماغهم فيه أفكار وحشه
ومن هنا نتقدم بخالص الشكر للكويز ولكامب ديفيد و لكل الناس المطبعاتيه الحلوة
وسمعني سلام و لاعزاء للمصريين
يا عيني عليك يا مصري لارحمينك ميت ولا حي
اللهم اخرب بيت اللي خلي المصريين يبيعوا عرضهم
ويبيعوا رفات أهلهم
(يا ولاد غنوا له ياولاد علي عرضه وطوله يا ولاد)
ولو عرفت هو مين اتصل علي صفر تلات زيروهات صفرين(أيوة صفر من بتاع كأس الفين وعشرة)
والجايزة معانا حاجات رمزية(عشان متبقاش حرام)
الجايزة الأولي : قميص جندي مصري مات في 67
الجايزة التانية: حته من العلم اللي اترفع في 73
الجايزة التالتة: يافطه من بتاعة المظهرات مكتوب عليه تسقط اسرائيل
بييييييييع يا عواد





1 comment:

مراقب مصري said...

يا أخي إحنا دايما كدة ناكل وننكر... خمسين ألف يورو يعني ربعميت ألف جنيه يدوهم للنفر وينخربوا طربة أمه... طب إيه المشكلة؟؟؟ الحي أبقى م الميت... يعني إنت بتدقق في حاجات غريبة... وإوعى تقول لي بقى كرامة الميت والدين بيقول ومش عارف إيه هو احنا أصلا يا راجل متمسكين بالدين في الأحياء لما نتمسك بيه في الأموات؟؟؟ لما أنفار عزبتنا بيتعذبوا في المعتقلات والأقسام وبنطرمخ ونسكت عشان جبانات وما بنراعيش ربنا ف حرمة أجشاد الأحياء هتيجي تقول لي نرعي حرمة الأموات؟؟؟ لأ ما لكش حق... وبعدين يا مصري أفندي يا صديقي هو مش عواد باع أرضه بمزاجه ولا حض عضه ف إيده عشان يبيع؟؟ عاش عواد زعيم البياعين وكما نهتف في المظاهرات... متباعة متباعة... متباعة

وبعدين أولاد عمنا الصهاينة الأحباء لما هيدوروا لنا ع الآثار مش ده في مصلحتنا ولخيرنا؟؟ إخص عليك يا عديم الوطنية.... إنت ما تعرفش إن كل مليون سايح بييجوا مصر بيجيبوا ميتين مليون فرصة عمل؟ طبعا ما بين ترجمانات في قصر فرعون اللي هيلاقوه وما بين دعارة في جامعة الدول (الشارع وليس المبنى طبعا) وملاهي ليلية وآلاف المطربين الداعرين من عينة الصغير وبعرور... يعني الحالة السياحية هتبقى نعنشة وفرفشة يا نكدي يا بتاع القيم والمبادئ

وبعدين قميص إيه اللي فيه دم دا بتاع 67 اللي بتحكي لي عنه؟؟ ياااااي دا ريحته وحشة أوي.... دا ما اتغسلش من أربعين سنة؟؟؟ إخي عليكوا شعب مش نديف... اتعلموا من أولاد عمكوا الوسخين اللي من كتر الحما والمنظر الحلو بيغطوا على وساختهم والعالم متعاطف معاهم عشان ريحتهم حلوة من برة بالرغم من عفانتهم من جوة... اتعلموها بقى

وإلى عواد أقول... بيع يا حبيبي لاولاد عمك... بيع أرضك وبيع عرضك وبيع مراتك كمان لو طلبوا... إيه المشكلة مادام هتقبض

ويعوض الله عليكي يا مصر