Monday 26 February 2007

الحقوا....قبل م عواد يبيع أرضه




كان في أغنية قديمة في مسلسل أيام زمان اللي محدش يعوي مننا عليها
كان فيها أطفال بيسخورا من عواد اللي باع أرضة
(عواد باع أرضة يا ولاد شوفوا طوله وعرضه)
جريدة المصريون نشرت خبر غريب
عواد بعد مباع ارضه في 48 ومفكرش في ولاده
ودلوقتي بقي بيتسول وطن
عواد جانا بلدنا
المصريون بتقول ان الصهاينة عايزين يشتروا أراضي بمبالغ خياليه
تفتكروا ليه
حزروا فزروا
قلت يمكن النبي سليمان كان بني هنا كمان هيكل...جايز
علي فكرة بيقولوا انهم بيدوروا علي اثار يهوديه
مش بس كده فهم كتر خيرهم بيدورولنا علي قصر فرعون اللي تربي فيه موسي عليه السلام
لدرجة انهم عرضوا شراء قري بأكملها للتنقيب فيها بهدف علمي
أوعوا دماغكوا تروح لبعيد
اللطيف في الموضوع انهم بيعرضوا علي الناس التنقيب في مقابر اهلهم
أي والله الخبر بيقول كده
50 الف يورو ثمن التنقيب في المقابر أو تحتها
أوعوا دماغكوا برضه تروح لبعيد
احسن المصريين دول دماغهم فيه أفكار وحشه
ومن هنا نتقدم بخالص الشكر للكويز ولكامب ديفيد و لكل الناس المطبعاتيه الحلوة
وسمعني سلام و لاعزاء للمصريين
يا عيني عليك يا مصري لارحمينك ميت ولا حي
اللهم اخرب بيت اللي خلي المصريين يبيعوا عرضهم
ويبيعوا رفات أهلهم
(يا ولاد غنوا له ياولاد علي عرضه وطوله يا ولاد)
ولو عرفت هو مين اتصل علي صفر تلات زيروهات صفرين(أيوة صفر من بتاع كأس الفين وعشرة)
والجايزة معانا حاجات رمزية(عشان متبقاش حرام)
الجايزة الأولي : قميص جندي مصري مات في 67
الجايزة التانية: حته من العلم اللي اترفع في 73
الجايزة التالتة: يافطه من بتاعة المظهرات مكتوب عليه تسقط اسرائيل
بييييييييع يا عواد





Thursday 22 February 2007

وما الدنيا الا (كلبش) كبير


تصدقوا ان الدنيا ده غريبة أوي!!!
من يوم منتولد و الكلابشات في ايدينا
اعمل ده و متعملش ده
سلطة في كل مكان
في المدرسة
فاكر الناظر والمدرس اللي كنت اول متشوفه تحس انك مخنوق منه
في الجامعة والف أاااه من اللي في الجامعة
السيد الاستاذ الدكتور اللي عايش دور راسبوتين عشان اول م الطلبة تشوفه تجري منه وكل ده عشان يخلص مركبات نقصه فينا
م هو طبعا في ايده نمر الشفوي والعملي و برضه له اصحابه في بقية المواد
مش بس كده ده يا بختك الاسود لو كان ابنه دفعتك
انسي انك تتعين
فاكر لما كنت انت و ابن الدكتور بتمتحنوا شفوي ودخل واحد ميل علي اللي بيمتحنك وقاله كلمتين و اداله ورقة فيها اسم ابن الدكتور
اه يا حرامية يا ولاد الــــــ  ولا بلاش الطيب أحسن
وكله كوم و امن الجامعة كوم
الواد أبو دبورتين اللي من حظك الأسود انه اتعين في الحرس و كل همه يتمنظر امام البنات
و ان نفدت من أبو دبورتين يطلعلك أبو نسر
وده اخرته وحشه
تتكلم تلاقي واحد رامي ودنه عايز يسمعك
وينقل كلامك للي مشغله
عصفورة يعني
اله تفك حبس كل سجين وتكسر قيض كل مكبل
اله تفك مصر من القيد الفضي أبو خمسة وعشرين رقم ولازال مستمر بنجاح ساحق حتي أخر نفس
ارحمنا بقي يارب