Wednesday 8 April 2009

عن اضراب الدكاترة بكرة..كلهم في العك و التهجيص سواء.. شيرشي الجرانديوزتي



الدكتور الكويس لازم يكون عنده شوية جرانديوزتي(تضخم في الذات)
"نقلا عن أحد أساتذتنا في الكلية"
=====
الأولة جرانديوزتي
لما أنا يكون عندي جرانديوزتي و معتقد أن انا أذكي عن غيري من البشر العاديين اللي مش دكاترة يعني
و فرضا أن الله أنعم ع الدكاترة لوحدهم بالذكاء والألمعية-و ده مما أري غير صحيح علي الأطلاق- أي و الله
و كما قال خالد الذكر خالد الصاوي
مبروم علي مبروم ميرولش
فيبقي عيب لما أستذكي ع الدكاترة اللي زيي
========
الثانية اضراب
 
عندنا اضراب بكرة
الخميس 9 أبريل
ياحلاوة المولد
المفروض كل الدكاترة تقفل عياداتها الخاصة
و ده اللي وصله مجلس النقابة الوطني الاخواني اللوزعي
كرد عنيف-نياهاهاها- علي ان ميزانية الصحة حتقل
ما يعني ان وعود الكادر كانت في الكلتش
و ان مجلس النقابة اللوزعي اتضحك عليه
فقرر يستخدم أقوي أسلحته و هو قفل العيادات الخاصة
يوم الخميس
بتقولوا ايه يا ولاد
الخميس
ايه ؟
الخميييييييييييييييييييييس
!!!!!!!!!!!!!!!
========
 و الثالثة سؤال
أي حد بيشتغل في حقل الطب البشري
أو حتي في مجال التسويق الدوائي
(ميديكال ريب)
يدرك أن معظم العيادات بتبقي أجازة يوم الخميس
يعني اضراب ناس في أجازة
طب يبقي اضراب ازاي يا دكتور هاني؟؟؟
و انا مالي اسألوا النقابة
!!!!!!!!!!
=================
الرابعة جواب 
يعني النقابة حتخلي الناس اللي في أجازة يعملوا اضراب من بيوتهم
أه
طب والسؤال هنا ازاي ده يبقي ضغط ع الوزارة اللي العيادات ده مش من مكونتها الأساسية لانها بالأساس تابعة لأفراد تشرف عليهم النقابة
برضه انا مالي
اسألوا حمدي السيد
أو عصام العريان
أيهما كان أقرب
و علي فكرة فيه بحسب النقابة عدد من العيادات حيكون مفتوح بكرة في كل حي والمستوصفات مفتوحة والمستشفيات 
طب يبقي اسمه ايه ده
================
الخامسة جابولي الضغط 
يعني حيضغطوا ع الوزارة بحاجة متأثرش فيها و بناس قاعدين في بيوتهم بالفعل
يعني انا عايز اعرف هم بيضحكوا علي مين
ع الدكاترة
يبقي عيب
ع الوزارة
مهم برضوا دكاترة مش جايين من صالون حلاقة
يبقي بيضحكوا علي مين
!!!!!!!!!!!!!!!
=================
السادسة استسهبال
(مسرحية العياال كبرت)
حسن مصطفي:حد يروح المدرسة يوم مولد النبي يا وله..يوم الأجازة
!!!!!!!
سعيد صالح:أه يا بابا رحت و فتحت الباب و ضربت الجرس و شرحت لنفسي ومفهمتش حاجة
!!!!!!!!!!!!!!!!!!!
=========== 
الأولة الجرانديوزتي
و
الثانية اضراب
و
الثالثة سؤال
و
الرابعة جواب 
و
الخامسة جابولي الضغط
و
السادسة استهبال
و
السابعة
هأوأو..ابقوا قابلوني لو فلحتم
==========
حد فهم حاجة؟؟؟؟

No comments: