Friday 15 June 2007

البيضة ولا الفرخة ....المسيحي ولا المسلم



سؤال غبي
مين الاول المسلم ولا المسيحي
اللي جه مصر الاول
اجابة بديهية
لا ده ولا ده
__
لسه فاكر وانا صغير عم الشيخ يقف ع المنبر
يجلجل بصوته
نحن لسنا ابناء الفراعنة
عليهم لعنة الله
بل نحن احفاد عمرو بن العاص
رضي الله عنه
_____
كنت في الكاتدرئية في العباسية بغطي مظاهرة للاقباط
ناس قالوا ان بنتهم خطفها واحد مسلم
و اتفرج ع الهتافات
عايزين و لادنا عايزين بلادنا
_______
المشهدين دول وان دلوا فانما يدلوا علي حالة
التغفيييييييييييييييل
الشديدة التي تعيشها مصر ما بين فكر ظلامي قادم من الشرق
و فكر تفرقي قادم من الغرب
يا سيدي احنا احفاد الفراعنة اللي قبل المسلمين والمسيحين
مصريون
منا من امن بالمسيحية
و منا من امن بالاسلام
لكننا في النهاية مصريون
حتي المزاوجة التي حدثت بين جيش عمرو بن العاص رضي الله عنه
و اهل مصر من القبط
انتجت مصريين
مش انا اللي بقول
علم الوراثة هو اللي بقول

لا المسحيين اخدوا الارض بوضع اليد
و لا المسلمين احتلوها

انا افخر اني مسلم و مصري و قبطي
و لعلم اخوانا الجهلة
كلمة قبطي معناها مصري
لما جاء اليونانين لمصر
سموا اهل مصر قبطا
للقماش الذي ينتجون ويلبسون
كل واحد حر في دينه
لا ده الاول ولا ده الاول
قبل دول مصر كانت موجودة
ولا اجد خيرا من كلام السميع العليم اذ يقول في كتابه العزيز
"... لتجدن اقربهم مودة للذين آمنوا الذين قالوا انا نصارى ذلك بأن منهم قسيسين ورهباناً وانهم لا يستكبرون "سورة المائدة .

و هذه الترنيمة
مبارك شعبي مصر ده وعدك من سنين

خيرك أكيد لأنك إله صادق أمين
(تيجي بغناك وتملا بيوت المحرومين

ويفيض النيل ويروي جموع العطشانين
صوت الحزن يسكت نرنم فرحانين

مبارك مبارك مبارك (مبارك)شعبي مصر

و قبل م امشي
الشعب هو للي مبارك مش حد تاني


1 HOME 1 PAIN


8 comments:

اه يا دماغى said...

الحكاية مش مين مسلم ولا مسيحى
ولا حتى مصر
الحكاية انا انسان
وكل انسان حر فى حياتة ومعتقداته قبل كل شىء
وياريت كل واحد يحاسب نفسه على اخطائة وتقصيره فى دينه سواء مسلم او مسيحى
لان وقتها الأتنين حيعرفوا التسامح فى الأديان وعدم التعصب
تحياتى

محمد هانئ said...

كريمة هانم منورة الكلبش
يا أهلا وسهلا
قولي للجهلة ضيقي الافق المرضي
ربنا يهديهم
التعصب بقي سمه مصرية
في الهواء
في المية
جايز
لكن الاكيد
ان الفضي والبطالة
لوثت الجو بتعصب اعمي
لا دفاعا عن الدين
لكن
لمجرد اثبات الذات


شكرا ع الزيارة

أحمد عبد الفتاح said...

قبطي ايه ومسلم ايه ؟
محدش واخد حقة في البلد ده الا الوطنيون الذين يدينون بالوطني دينا وبمبارك زعيما ملهما وبجمال المخلص المنقذ
والله احنا هبل
عمالين نتخانق
وهما فرحانين وبيصقفوا لهبلنا
ده احنا غلبنا حماس وفتح بنتخانق وسايبين اسرائيل تصقف علي هبلنا

MOHAMAD HANI said...

ابو حميد بتاع المحظورة
و احشني يا راجل
يا عن احنا مش هبل
الناس عندنا بقت فاضية
يعملوا ايه يعملوا ايه
يهاجموا النظام الظالم لا بلاش احسن ده اخرته بانرز و افرجوا عن كذا وحاجات من كده
نعمل ايه
نحارب بعض
و اهو بكده نقول لربنا احنا بنحبك يا رب
رب يشفي الاغبية من الغبا

boshra mohamed said...

برغم كل مظاهر التسامح اللى بتطفوا على السطح بين المعسكريين , وبرغم كلامك الجميل المشجع ... لكن جوه القلوب غربة وكل واحد مستنى للتانى غلطة وخصوصا الجانب المسيحى
نفسى فعلا نبقى زى ما اه يادماغى قال
وقتها الموضوع حيفرق كتير

MOHAMAD HANI said...

عزيزي بحب السيما
مفيش تسامح
فيه مكياج بيتحط علي العلاقات عشان نضحك علي انفسنا
دعوة الباب لفطار رمضان
حضن البابا لشيخ الازهر

ضحك علي الدقون

لازم اللي بيديروا الامور يعترفوا بالمأساة اللي عايشينها

و علي فكرة النظام بيلعب بالورقة ده علشان يلهينا عن بلاويه

كان غيره اشطر
لعبة سياسية حقيرة حتحرقة زي ما نيرون حرق روما
ربنا يسطر

(المصري افندي)

مطرح ما ترسى....دقلها said...

اسلوب عرض رائع يا محمد بيه

بجد لمست وتر حساس ببراعة واقتدار

مستنى الجديد

وعلى فكرة انا فى طب الزقازيق

بس ما ينفعش اقولك فى مدونتى

MOHAMAD HANI said...

يا الف اهلا و سهل يا
almeder
ده اطراء يسعدني
انا طب عين شمس
الف شكر علي الزيارة اللي بجد فرحتني