علي طريقة مسلسل لن اعيش في جلباب ابي
بعد ما عبد الوهاب اشتغل مع والده وشرب الصانعة
قرر انه يفتح وكالة خردة لوحده
قصدي حزب
حيسموه المستقبل
يار اجل ده حيبقي مستقبل لطيف جدا باين عليه
الاخبار جت في جريدة المصريون
جمال مبارك يستعد لتقديم اوراق اعتماد حزب جديد اسمه المستقبل
علي فكرة اسم المستقبل ده كان بتاع حزب ايمن نور الاولاني اللي اترفض لحد ما وافقوله علي الغد
ما علينا...نتكلم جد بقي
هذه الخطوة وان دلت فانما تدل علي ان التوريث ماشي زي الحلاوة وعلي الطريق الصحيح
ليه؟؟؟؟؟؟....سؤال حلو
من المعروف ان جمال جامع حوليه مجموعة تكنوقراط و اساتذة جامعات ملهاش في السياسة
يعني لو اشتغل بيهم انتخابات حرة ياخد علي نفوخه
يبقي الحل ايه
ناخد شوية من اللي بيعرفوا يخلصوا الحاجات ده من الحزب الوطني
طب ازاي؟؟؟
نعمل حزب
السؤال هنا
لما السادات ساب حزب مصر وعمل الحزن الوطني جري الكل وراه
لكن جمال حيسيب حزب ابوه ويعمل حزب...تفتكروا حد ممكن يروح
حيقفوا في النص....نروح مع جمال ولا نلعب علي الكبير
سؤال صعب
لكن في الاخر محدش حيروح...الا
حالة واحدة ان الكبير يقولهم روحوا
وده معناه انه يبقي رئيس بلا حزب
وده مؤشر لاعتزاله السياسة
طب السؤال هنا
لو الحاج ابو علاء مات قبل مالحزب يتعمل...ايه الحل
فيه سناريوهات كتيرة نتكلم عليها بعدين
المهم منها فعص جمال سياسيا لو ماخدش المبادرة ولحق ينط علي رئاسة الحزب الوطني
واللي اظن محدش حيعارضوا في الوصول ليه
بس ساعتها فيه ناس حتدرك ان ساعة دخولها النعش جت
حتحاول تقاوم تتزلل لكن خلاص العجلة دارت وحتدوسهم
الغريب ان صفوت الشريف اللي حيوافق علي تاسيس الحزب كونه رئيس لجنة تعذيب الاحزاب حيكون اول ضحية ليه
حنقول ايه طباخ السم حيدوقه
وفي نهاية البرنامج احب اقرا برقية تهنئة
من جمال الي الحاج ابو علاء
العنوان وكالة الحاج جمال الصغير وكالة البلح ع الكورنيش
نعرفكم ان الخطة ماشية تمام والقزازة في البزازة
والعاقبة عندكم في التوريثات
تحديث
........................
جمال بيه خرج النهاردة وأكد ان المعلومات ده مغلوطه
وانه حييفضل في وكالة الوالد عبد الغفور البرعي و لن ينشئ وكالة خردة خاصة
ونظرا لما يتمتع به ابن المعلم الكبير من مصداقية فنحن نصدقه
و مصدقين كمان انه مش حيورث الوكالة
أه نسيت اقلكم
علي فكرة وكالة البلح حيغيروا اسمها ويخلوها
وكالة القرع المباشر
هوامش :الصورة من مدونة عزبة الحاج ابو جمال
5 comments:
لا لا بس غريبة جداً جداً
انا مش عارف طيب هو محتاج تجميل
ولا بيهمه منظره
ثم على كده هنلاقى الحزب الوطنى بينافس نفسه ولا إيه
ثم برضه
قال يعنى هو فى إختلاف برنامج ولا رؤية ولا أى حاجة
(ده على أساس أنهم الاثنين لهم رؤية أساساً غير رؤية الكرسى)
علشان يعملوه حزبين
ازيك يا حودة
الفرق يا سيدي
ان الحزن الوطني(المفروض)حزب يمين الوسط
وحزب جمال عبد الغفور البرعي (المفروض) ليربرالي
بس يعني داقت في دماغه الاسامي ملقاش غير الاسم بتاع ايمن نور
حاجة تقرف
كده برضه يا حودة مقلتليش رأيك في الكاريكاتير بتاعي
نورت في الكلبش يا بن اخ
طب ويعمل حزب جديد ليه؟
طب يا يمشي الحاج ويستقل بالدكان
فكرك ميقدرش؟
ازيك يا زنزانة يا غالية
شوفي يا ستي
انا في راي
لا جمال ميقدرش يمشي الحاج من الوكالة
ليه؟
اقولك
اول حاجة ان معظم اللي في الحزب الوطني ولاؤهم للوالد
لانه حاليا الاقوي
تاني حاجة
جمال يفتقد اهم عنصر في اللعبة السياسية في بلدنا
ولاء الجيش
وده حاول انه يجيبه بموضوع المفاعل
لكن لظروف جايه من بره اتاخر تنفيذه
ثالث حاجة
اللي محتاج للتاني هو جمال
رابع حاجة
شئنا ام ابينا الجهاز الاعلامي الجميل بتعنا خلا لسه وصدقيني لو قلتلك ان فيه ناس بتحب الوالد لاننا اتعودنا ان الفرعون برئ ديما و محب لشعبه بل واله للرعية
اما حاشية الكهنة فهي سبب كل الشرور
وعشان كده الوالد هو اللي ممكن يطرد جمال
اما العكس
فمستحيل
في رايي
علي الاقل حاليا
نورتني يا زنزانة
طب ما تعلقلك كده يافطه تهنى فيها الحاج بجوازة الواد ولا تعلقلك تعليقاية من بتوع البلوج
ده حتى يبقى حاجه مفيده للشيعب العربى
http://elezba.blogspot.com
Post a Comment