Thursday, 22 February 2007

وما الدنيا الا (كلبش) كبير


تصدقوا ان الدنيا ده غريبة أوي!!!
من يوم منتولد و الكلابشات في ايدينا
اعمل ده و متعملش ده
سلطة في كل مكان
في المدرسة
فاكر الناظر والمدرس اللي كنت اول متشوفه تحس انك مخنوق منه
في الجامعة والف أاااه من اللي في الجامعة
السيد الاستاذ الدكتور اللي عايش دور راسبوتين عشان اول م الطلبة تشوفه تجري منه وكل ده عشان يخلص مركبات نقصه فينا
م هو طبعا في ايده نمر الشفوي والعملي و برضه له اصحابه في بقية المواد
مش بس كده ده يا بختك الاسود لو كان ابنه دفعتك
انسي انك تتعين
فاكر لما كنت انت و ابن الدكتور بتمتحنوا شفوي ودخل واحد ميل علي اللي بيمتحنك وقاله كلمتين و اداله ورقة فيها اسم ابن الدكتور
اه يا حرامية يا ولاد الــــــ  ولا بلاش الطيب أحسن
وكله كوم و امن الجامعة كوم
الواد أبو دبورتين اللي من حظك الأسود انه اتعين في الحرس و كل همه يتمنظر امام البنات
و ان نفدت من أبو دبورتين يطلعلك أبو نسر
وده اخرته وحشه
تتكلم تلاقي واحد رامي ودنه عايز يسمعك
وينقل كلامك للي مشغله
عصفورة يعني
اله تفك حبس كل سجين وتكسر قيض كل مكبل
اله تفك مصر من القيد الفضي أبو خمسة وعشرين رقم ولازال مستمر بنجاح ساحق حتي أخر نفس
ارحمنا بقي يارب

4 comments:

أحمد عبد الفتاح said...

كده تقلب علينا المواجع
بس يادوب انت قلت علي كلبشين بس
محكتش عن كلبشات كتير مقيادنا
مبروك المدونة
ويارب تكون احلي مدونه في الدنيا - بعد بتاعتي طبعا -
وعقبال الي لسه معملوش مدونات يارب

المصري افندي said...

لقد تشرفت بان تقص الشريط يا حمادة
المهم متقطعش الكومنتات

أحمد عبد الفتاح said...

علي فكره يا عم الريس الدنيا مش كلها كلبشات يعني لازم تكتب بقه
مش معقول هو موضوع واحد بقراه بقالي اسبوع
اكتب عن اي حاجه ان شاء الله عن غداء النهرده الي مكنش عاجبك
مدونين اخر زمن

Reformer1976 said...

يا لهوييييييي

أيوة يا سيدي فاكر دا كله... وفاكر كمان قرف الدكتور اللي نزلني من امتياز لجيد جدا عشان أنا مسيحي... وفاكر دكتور البارا( كان اسمه عبد الله )اللي قعد يتريق علي وعلى اسمي في الامتحان الشفوي وطبعا افتكرت إنه متطرف وبيضطهدني دينيا عشان انا مسيحي واتصدمت لما عرفت إن اسمه عبد الله ميشيل هههههههههههه وإن ما إلا بس كان بيهزر معايا ودي طريقته مع الكل

وفكرتني لما كنت قاعد مع زميلة ليا في ملطعة كلية طب قصر العيني وجه عليا أبو نسر يتمنظر عليا قدام الزميلة ويقول لي كارنيهاتكوا يا أساتذة وإيه اللي مقعدكوا لحد دلوقت (مع إن الساعة كانت أربعة العصر وعادي جدا) يوووووووه فكرتني بكل ده يا راجل وربطته في دماغ بالكلابشات... برافو عليك صدقني... فعلا نحو نحيا في زمن الكلابش... برافو عليك اختيار اسم المدونة