Friday 27 April 2007

مش كفاية كفاية (العدد الاول المصري افندي في الكلبش) مجلة








محتويات العدد

مش كفاية كفاية

فلاش

اجتماعيات 2012

احلام يقظة




للاتصال:
flklabsh@hotmail.com

موقع المدونة
Klabsh.blogspot.com





فلاش


- لا اراكم الله مكروها في اهلاويا لديكم
- العيب مش في اللعيبة العيب في عقدة الفانلة الصفراء (مشجع اسمعلاوي)
- السادة الشيوخ الافاضل اللي تفرغوا لرفع دعاوي قضائية ودعاوي حسبة وكل ده عشان يبانوا ويتشهروا اقولهم اتقوا الله و قبل متكفروا حد شوفوا اللي غرق 1300 بني ادم ولا اللي موت المئات في قطار الصعيد و حضراتك سكتم بكتم اكيد طبعا ده ناس كويسه وناس افاضل
- شيوخنا الافاضل اللي اصبحوا فاضيين للروايات والقصائد والجرائد احب اقول لحضراتكم ان خير الجهاد كلمة حق في وجه حاكم ظالم كفاية انبطحاية وهروب يا شيوخنا الافاضل
- نفسي اعرف ازاي شعب بيعاني من ازمة اقتصادية خانقة يوصل به الحال لدفع 150 جنيه لتذكرة مباراة الاهلي....السبب ان الشعب الغلبان مش هو اللي راح المباراة هو اللي بات قصاد النادي مستني التذكرة ام 25 جنيه طبعا لان كريمة الشباب طبعا هي اللي راحت عشان نشرف مصر قصاد العالم بدل الرعاع اللي بيشجعوا و يقفوا ورا فريقهم حتي وهو بيخسر....نادي بشاوات بصحيح
- حمادة كان قاعد مع جدو بيتفرج ع الماتش ورا الزجاج المضاد للصواريخ البالستية اللي في استاد القاهرة
عقبال ميقعد مع عمو جمال يتفرج برضه ورا الزجاج بعد اربع سنين طبعا يا ريس
- مبروك فيه سجن جديد بيتبني سعته 120 الف سجين.......بركاتك يا تعديلات
- مبروك عليك رئاسة فرنسا يا ساركوزي...عرفت منين؟؟؟؟....بالعقل هو 30% روايال 25 % ..بايرو 18...لوبان 11%..اصوات لوبان اليمين المتطرف مضمونه لساركوزي و حنقول ان بايرو لانه يمين الوسط ف1\3 الاصوات ع الاقل تروح لساركوزي ...مبروك تاني مرة يا ريس..ساركوزي
- نفس الرائحة العفنة التي ازكمت الانوف في 1975 تهب من لبنان..مناوشات في معسكرات اللاجئين الفلسطينين
مقتل شابين في منظقة نفوذ الحزب الاشتراكي التقدمي بزعامة وليد جنبلاط
نفس المقدمات تتجه لتكرار المأساة والمعارك و الثلاثاء الاسود
الجديد دخول وليد جنبلاط من البداية لا كالمرة الماضيةبعد اغتيال والده كمال
و دخول حزب الله الملعب بثقله
حزب الله من ناحيته يحاول اشعال حرب جديدة مع اسرائيل بوضع صورة كبيرة للعسكريين الاسرائليين المختطفين من قبل حرب 2006
ارحموا لبنان وارحمونا




حوليات تفصيل الكستور
الحلقة الرابعة والاخيرة
مش كفاية كفاية

و لماذا الحديث عن كفاية؟
لان كفاية هي القوة الاكثر فاعلية و قبولا شعبيا من الشعب عن احزاب العظام النخره
اود انني- و لو اني لست كفايويا- الا اني اري انها الامل للحراك بعد سبات ابي الهول الذي نعيشه
لقد حققت هذه الحركة حراكا لم يكن متوقعا
بدأت الحركة بهدف واحد
انهاء حكم مبارك و منع التوريث
و رغم انه لا هذا ولا ذاك قد تم منعه
الا ان الحراك الذي قامت به كفاية في وقت قصير في عمر الحركات المعارضة عالميا جدير بأن نتاملها و نمحص في اسباب بداية دب الضعف فيها
فالحركة تنتحر داخليا
و من لا يعترف بالازمة الحالية اما جاهل و اما جاحد
و اود ان اوضح انني لا انتقد اشخاص ولكن انتقد مواقف وتصرفات
و الموضوع لا يتعد عين مراقب و محلل لاحداث
و اسمحوا لي ان ابدأ مباشرة بالتعديلات الدستورية لانني لست بمعرض تأريخ لكفاية
كفاية وغيرها كانوا علي علم بالتعديلات قبلها بفترة
و لم تتحرك كغيرها..ربما هي عادتنا المصرية في الحركة عندما يبدأ القطار في مغادرة المحطة..ربما
بداية انهياركفاية جائت عندما خرجت اصوات مطالبة بتنحي جورج اسحق عن مقعد المنسق العام والذي شغله منذ بداية الحركة
و علي الرغم من شهادة الجميع لجورج اسحق بالدينامكية
الا ان هذا لم يشفع له للاستمرار في منصبه
و جاء رد فعل عنيف بخروج عدد من القيادات المؤسسة للحركة اهمهم النائب الصعيدي السابق
(جمال اسعد)
وهذا شاهد اول علي الازمة
و كان لابد من التغيير
فاتوا بالدكتور الرائع عبدالوهاب المسيري
و لا خلاف عليه
فالرجل يحظي بمحبة الجميع و له رأي حر
وو تتلمذ علي يديه وعلي كتباته كل مثقفي هذا الجيل(و انا اولهم)
فالرجل يمثل قيمة رائعة وغالية لدي جموع المثقفين والمشتغلين بالسياسة
ولكن
دكتور عبد الوهاب لا يصلح ليقود الناس في الشارع
فلقد سقطت قلوب جميع المصريين في اقدامهم عند رؤية الدكتور عبد الوهاب في المظاهرة امام حزب التجمع والتي-و قد ستر الله من عنده- كاد ان يداس فيها باقدام عساكر الامن المركزي و الذين لو عرفوا قيمة الرجل لحملوه فوق رؤوسهم…ما علينا
و ربما كان هذا سبب الاختيار فالرجل بما يمثل من قيمة علمية وادبيه يفخر كل مصري بها
الا انه النقيض التام في العمل السياسي من جورج اسحق وربما كان هذا السبب في اختياره
لقد ارادوا البرهنه انه لا يملأ فراغ اسحق الا هو
و قد اكد لي البعض ولكنني لم اتاكد من مصدر مستقل ان جورج اسحق اطلق اشاعة انه قد تم اختطافه ليلة التعديلات الدستورية
هذا شاهد ثاني علي ازمة كفاية
الشاهد الثالث هو موقف شباب مجموعة 30 فبراير مثل علاء ووائل عباس
والذي خالف توجيهات كفاية بمقاطعة الاستفتاء
و قالوا كفي سلبية اذهبوا وقولوا لا
و قد وضحت في الحلقة السابقة من هذه السلسلة رايي في هذا التوجه
و المؤشر الرابع والاخير علي ازمة كفاية هو الموقف المائع الذي اتخذته كفاية علي لسان جورج اسحق-و الذي لو لاحظتم عاد للظهور من جديد في المؤتمرات والمظاهرة التي كانت اما نقابة الصحفيين يوم الاستفتاء- و كان الموقف هو توعية الناس- بعد اقرار التعديلات- بمخاطر هذه التعديلات واثرها السئ…يا سلام
المشكلة في كفاية هي هراركية اتخاذ القرار والذي متعدد الرؤس
Multi headral system of decision making hierarchy
المهم ان هذه كلها مؤشرات خطيرة لكفاية تدل انها تعيش ازمة منتصف العمر للتنظيمات السياسية
المشكلة في كفاية انها نشات كحركة احتجاجية فقط
بلا برامج لمرحلة ما بعد تحقيق طموحاتها ان حققت
و اذ فجأة صار الاحتجاج حلما للمحرومين
وهذا وضع مسؤليات جديدة علي عاتقها
و اصبحت كلمة كفاية رعبا للنظام
و لكن في المقابل صارت كل جماعة بما لديهم فرحون
ظهرت التوازنات والتكتلات داخل كفاية
كل اصبح له شله وتنظيم له الاولية علي الحركة
فهل هذا مؤشر علي خريف كفاية ؟؟؟؟
ادعوا الله ليخيب ظني ويظهر الربيع الكفايواي من جديد
امين




اجتماعيات

ركبت الة الزمن اللي راكنهاتحت البيت
و قلت اطلع علي 2012 اشوف ايه اللي جري
اول حاجة لفتت نظري اني لا لقيت الفجر ولا الدستور ولا حتي المصري اليوم
قلت يمكن حال ادنيا انصلح
رحت مشتري الاهرام اهو اشوف ايه اللي جري في الدنيا
و اطمنكم ان مصر لسه موصلتش كاس العالم ولا حسام حسن اعتزل
بس فيه كام صورة شفتهم ربنا مايوريكم
هام :لاحظوا التاريخ في الصورة الاولي










بصراحة لما شفت كده قلت ارجع و اقولكم وابسكم بالمستقبل الرائع

ملحوظة:الصور-بجد- من الاهرام لهذا الاسبوع فيها لعب علي خفيف اوي
بس بجد عاوز اعرف ده لو مش صور رئيس تبقي صور ايه
التوريث كاس ومكتوب علي كل الناس



احلام يقظة

تم قطع المياه عنا لان
الماسورة انفجرت
و نظرا لانني و سيادة الريس نتفق في محطة مياه واحدة
فلقد ظننت وبعض الظن اثم ان سيادته المياه قطعت عن بيته سيادته
تخيلت سيادته وهو يا عيني لا بس البيجامة و لابس شبشبه ونازل و في ايده جركن مياه عشان يملا من محطة البنزين ولا الجامع اللي جنب نادي هليوبلس
و تخيلت معاناة سيادته وهو رايح واقف في الطابور مع الشعب ليملأ الماء او ليشتري زجاجات المياه المعدنية زي عامة الشعب
طبعا لان سيادته حاسس بمعاناة الشعب الغلبان
اللي مش لاقي الصرف اصلا
و لا معاه فلوس يجيب المياه المعدنية
منها لله جاأت المصري اليوم صحتني من الحلم اليوتويبي ده
و طمنتني علي سيادته
المياه لم تقطع عن قصر الرياسه
حتي في المياه في خيار و فاقوس

















Friday 20 April 2007

محمود شاكيرا و مستر ايجيبت....اشكالية النخاسة و الخنوثه


كانه مش كفاية علينا الوكسة السنوية اللي اسمها( مس ايجبت) اللي بناتنا يطلعوا في سوق النخاسة قصاد اساتذة افاضل يقيموا مين احلي من التانية ومين ملفوفة القوام اكثر من التانية.....شئ مقزز ومقرف كل سنة...لكن حنقول اه بنات طقه اما اهلها مربوهاش او هي اللي صوتها من دماغها....مش قادر افهم ازاي واحدة تقبل تلبس اللبس الخليع و تقف قصاد رجالة يتفرجوا عليها
لكن اللي مش قادر افهمه ازاي راجل طول بعرض يقبل علي نفسه كده؟؟؟؟؟؟
أبص الاقي ان فيه كارثه طلعت اسمها (مستر ايجيبت)..يا نهار اسود وصلت لكده..اه يا بلد الفراعنة...و يقولوا في الاغاني رجالة و طول عمر ولادك يا بلدنا رجالة....ههههه راحت عليكي يا مصر
البهاوات كل واحد ملبسينه بادي و خارج علينا مسبل عينيه
و يقول سنه و بيحب ايه و في الاخر
VOTE FOR ME
لا و ايه طول بعرض و في الاخر طالع كده
رغم عدم حبي لعبدالناصر لكن سمعت انه كان ايامه اقامت مجلة مسابقة لاجمل عيون فاذ بالشباب يرسلون صورهم وكل واحد منهم قد سبل عينيه...فما كان من عبد الناصر اللا ان امر بالاتيان بهؤلاء الشبان و حلق شعرهم علي الزيرو !!!!!!!!
مش قادر اعرف فين نخوة الرجل لما بقف قصاد الناس تتفرج عليه....هو اللي بيجري مبقاش دم بقي ايه....بيبسي –ولا بلاش عشان المقاطعة –نخليها مكة كولا و ساقعة كمان.
لا واستنوا و ما تزعلوش ع الرجولة المفقودة...نلاقي مكتوب في الجرايد عن واحد اسمه محمود شاكيرا وبيشتغل راقصة بلدي......اسف راقص بلدي...يلبس الجلبية و يرقص بالعصاية....لا و فوق كل ده عندها....قصدي عنده (شنب)
حجته في هذا ان الارتفاع في الوعي الديني خلا الناس متشوفش الراقصات لمجونهم وخلاعتهم فعشان كده هو بيرقص -كتر خيره- عشان الفن و الرقص مش للاثارة
و هو الدين قالك يا بني ادم ترقص و تتقصع قصاد الناس
ضيعتوا الدين و ضيعتوا الدنيا جاتكم القرف.....
هي ده الحقيقة يا اخوانا مصر تعيش ازمة رجولة و الفرق بين الذكورة والرجولة واضح.
ليه؟؟؟ لان الرجل اللي يقول كلمة الحق ييتراقب و ييتسجن
اما اللي يهز وسطه و يلبس البادي و يقول
VOTE FOR ME
 هو ده اللي يعجب و يعيش في البلد معزز مكرم
الله يرحمك يا رجولة الله يرحمك يا كرامة الله يرحمك يا دم
ياللي حتي الاكياس اللي كانت شيلاك طلعت بايظة
و نظرا ان البعبع اللي في البلد دلوقتي هو المدونون
احب تشوفوا الكاركتير ده



لقراءة التعليقات علي موقع
dvd4arab
اضغط هنا


Sunday 15 April 2007

للمظلومين ....و بس







هذا الفيديو من انتاج بنت الشلبية
و هو اهداء مني لمنعم ولكل واحد مظلوم مقهور قسيت عليه بلده



الحرية لمنعم




اختلافاتي مع الاخوان كثيرة
اختلافات في الايدلوجية
و اختلاف في الاراء
لكن هناك مواقف
مالم نتضامن مع بعضنا
لا نستحق
ان نعيش تحت سماء هذا الوطن
ولا ان نحمل لقب
مصري


الحرية لمنعم

ملحوظة:هذه البانرز من تصميمي


Wednesday 11 April 2007

بيان هام

يقوم احد الاشخاص يدعي المصري افندي
بوضع ردود علي مدونة الزميل وائل عباس الوعي المصري
و انا لا اعرف ا أنا اسبق في اختيار الاسم ام هو
هذا واني اعلن امام الجميع انه لا علاقة لي بهذه الردود التي
تحتوي علي شتائم وبذائات لا مبرر لها
ففي راي المعارضة تكون بمجابهة الحجة بالحجة لا بالسباب
هذا واني اعلن برأتي الكاملة من هذه الردود
و ان كنت ساكتب رد عند وائل عباس او غيرة ساكتبه تحت اسم
المصري افندي في الكلبش
حتي لا يحدث خلط
و حتي لا يتسرع احد و يتهمني لمجرد تشابه الاسماء الغير مقصود من قبلي
لذا وجب التنويه
اللهم بلغت اللهم فاشهد
و السلام عليكم ورحمة الله

Friday 6 April 2007

حوليات تفصيل الكستور الحلقة الثالثة.....مقاطعة تايهة يا ولاد الحلال


انتهي الاستفتاء
وانفض المولد
ويبقي سؤال لازل لم يجب عليه احد
هل كانت المقاطعة هي الحل فعلا؟؟؟
انا قاطعت وغيري من المدونين خرج يقول اذهب وقل لا
اختلفت معهم وظللت لبعض الوقت افكر
حتي بلورت قناعتي الشخصية وقاطعت
ليس استجابة لاحزاب المعارضة ولا الاخوان ولا كفاية
انا لا انتمي لاي منها و لازلت-حتي الان- مستقل
فصوتي ياتي من راسي ومن قناعاتي الشخصية
اريد هنا ان اوضح ان ما ساسرده ما هو الا تحليل شخصي بحت لمواقف المعارضة كل علي حدة
لكن اولا السؤال لازل باقيا لماذا قاطعت المعارضة؟؟
اولا : وانا في رايي انه لو كانت المعارضة قد قاطعت لهذا السبب فهي بارعة سياسيا و ان كنت لا اعول القدر الكبير علي براعة المعارضة وقادتها الا وهو معرفة المعارضة بقرب انخابات مجلس الشوري والصراع الداخلي في الوطني علي الترشيح ما يجبر كل طامع في الترشيح علي بذل كل الطرق الشريف منها و المزور منها للوصول لاعلي نتيجة تصويت تضعه كمرشح اول للحزب....ومع تسليم المعارضة بان نتيجة الاستفتاء محسومة...فقد وضعوا الحزب الوطني في خانة اليك كما نقول في مصرعلي طريقة
احنا مش رايحين ورونا حتعملوا ايه
حتطلعوا النتيجة عالية مع العلم ان اللجان حتكون فاضية مش استجابة للمعارضة بس لكن الناس حتقول انا معارض وقاطعت وجنابه مكنش له مزاج يروح ينتخب اصلا و اهو يكون واد فاهم سياسة ومعارض
ولا حتطلعو النتيجة منخفضة وتبينوا للناس انكم اه اخدتوا اغلبية عالية لكن بالتزوير
او الحل الثالث انكم تطلعوا النتيجة اللي حتكون فعلا موافقة ع الاستفتاء لكن بنسبة ضئيلة ونسبة حضور شديدة التدني وده حيكون اعتراف بهزيمة الوطني
اللي انا قلته ده لو كان قادة المعارضة فكروا فيه او حتي في جزء منه
يبقي برافو
لكن اشك
ثانيا: المقاطعة كان هدفها الاساسي هو حرمان الوطني من شرعية يفتقدها اصلا
نبص لكل حركة او حزب قاطعت ليه في رايي الشخصي
الاحزاب:الوفد التجمع الناصري
احزاب ضعيفة هشه اللي اقصي حد... ليست لها كلمة حتي علي اعضائها ولا يسمع لها صوت الا داخل جدران احزابهاوتمزقها الخلافات علي المناصب اما خارجها فلا صوت ولا نفس فلو قالت احنا حنروح ونقول لا سيضعوا انفسهم تحت ضرس الحزب الوطني اللي حيطلع نسبة الرافضون للتعديل نص في المية وده معناه ان الاحزاب قوة تاثيرها علي الشعب نصف المائة وانا في رايي ان ده الحقيقة
الاجزاب لازالت تنهل من رصيدها التاريخي و اللي قارب علي النفاذ لانها احزاب متقوقعة ضعيفة فاشلة ان جاز التعبير
الاخوان: كان صراعنا و زعيقنا علي المادة 88و 179 لكن الاخوان كان همهم الاكبر المادة اللي حتمنع تكوين احزاب علي اساس ديني ضربة قاسمة لحلمهم في حزب
لكن الاخوان انعودوا علي العنل من غير شرعية
كأن اللي في الشرعية من احزاب لهم لازمة... لكن الخطورة في قانون مباشرة الحقوق السياسية اللي حيطلع اظن السنة الجاية و ده اللي حيكون فعلا تحزيمة قوية للاخوان لذالك فهم ارادوا تحسين علاقتهم بالاحزاب مع علمهم ان عقد صفقات مع الوطني في الوقت الحالي مستحيل بعد حدوث شبه –و شبه فقط- صدام مباشر
فالاخوان في حاجة الي احزاب اكثر من حاجة احزاب التلاجة لهم
مع علم الاخوان ايضا وتسلميهم بان الاستفتاء محسوم
اما الشو بتاع الاستقالة من مجلس الشعب فده ميضحكش بيه علي عيل صغير
مفيش استقالات والا حيكون انتحار سياسي للاخوان خاصة مع وصول عبدالوهاب المسيري للتنيسق العام في كفاية-انا عاشق لهذا الرجل وفكره لكن في السياسة اسف يا دكتور جورج اسحق اقوي بمراحل- خاصة وان الدكتور المسيري من دعاة التقارب بين كفاية والاخوان وكانه لا يعلم ان الاخوان لو دخلوا كفاية ابتلعوها بدل من ان ينضموا كافراد تحت لواءها فهم اخوان تبع كفاية وليسوا تابعبن لكفاية بالدرحة الاولي
كفاية: لماذا قاطعت كفاية كفاية هي القوة المرضي عنها اكثر من غيرها من معظم فئات الشعب المصري لانها تحقق حلم المعارضة والتظاهر بعيد عن التنظيمات السياسيةبشكلها الرصين التقليدي فهي حركة احتجاجية اكثر من كونها تنظيم سياسي
ولمن لا يعرف فان كفاية و ان كانت محبوبة من الشعب فهي قي شبه انهيار داخلي لغياب التتنطيم وهراركية اتخاذ القرار فأعضائها وخاصة المدونين منهم لم يلتزموا بقرار قيادة الحركة بمقاطعة الانتخابات ووضعوا علي مدوناتهم اعلانات تدعو الي وقف السلبية والذهاب للاقتراع وقول لا وبهذا يكونوا قد وقعوا في فخ الوطني
وهذا قد يكون اول مسمار –لا قدر الله- في نعش الغالية علي قلبي كفاية
يا سادة هذا وقت انتخابات واقتراع وليس وقت تعليم الناس اسس المشاركة السياسية
اما اخطاء كفاية فافرد لها تدوينة اخري ولا محل لذكرها الأن
ولربما كان هدف قيادة الحركة الخروج باكبر قدر من المكاسب من فضيحة الاستفتاء
الا وهو الاستمرار في تعرية النظام امام الشعب وامام المنظمات الحقوقية الدولية
بس علي فكرة النظام بيتعري بقاله كتير بس هو ما بينكسفش
فالذهاب للاستفتاء والذي كان قادة الحزب الوطني وابواقه يخرجون يوميا في شبه محايلة علي الناس ليذهبوا للاستفتاء
في رايي ان المعارضة بعدم كشفها العدد الحقيقي لها بالذهاب للاستفتاء قد كسبت نقطة علي الوطني لانها لو كانت قالت اذهبوا وابطلوا الاصوات او ارفضوا التعديلات كانت قد كشفت عددها والذي هو حقيقة (فضيحة) و مؤسف باستثناء الاخوان والمتعاطفين -وليسوا الاعضاء- في كفاية و هم كثر
ومن اهم المكاسب التي خرجت بها المعارضة مجتمعة تحت لواء الوفد في البيان الذي القاه من هو مفترض ان يكون رئيسه
صدقوني لقد اتخذت المعارضة القرار الصحيح

Wednesday 4 April 2007

لن اعيش في جلباب مبارك


علي طريقة مسلسل لن اعيش في جلباب ابي
بعد ما عبد الوهاب اشتغل مع والده وشرب الصانعة
قرر انه يفتح وكالة خردة لوحده
قصدي حزب
حيسموه المستقبل
يار اجل ده حيبقي مستقبل لطيف جدا باين عليه
الاخبار جت في جريدة المصريون
جمال مبارك يستعد لتقديم اوراق اعتماد حزب جديد اسمه المستقبل
علي فكرة اسم المستقبل ده كان بتاع حزب ايمن نور الاولاني اللي اترفض لحد ما وافقوله علي الغد
ما علينا...نتكلم جد بقي
هذه الخطوة وان دلت فانما تدل علي ان التوريث ماشي زي الحلاوة وعلي الطريق الصحيح
ليه؟؟؟؟؟؟....سؤال حلو
من المعروف ان جمال جامع حوليه مجموعة تكنوقراط و اساتذة جامعات ملهاش في السياسة
يعني لو اشتغل بيهم انتخابات حرة ياخد علي نفوخه
يبقي الحل ايه
ناخد شوية من اللي بيعرفوا يخلصوا الحاجات ده من الحزب الوطني
طب ازاي؟؟؟
نعمل حزب
السؤال هنا
لما السادات ساب حزب مصر وعمل الحزن الوطني جري الكل وراه
لكن جمال حيسيب حزب ابوه ويعمل حزب...تفتكروا حد ممكن يروح
حيقفوا في النص....نروح مع جمال ولا نلعب علي الكبير
سؤال صعب
لكن في الاخر محدش حيروح...الا
حالة واحدة ان الكبير يقولهم روحوا
وده معناه انه يبقي رئيس بلا حزب
وده مؤشر لاعتزاله السياسة
طب السؤال هنا
لو الحاج ابو علاء مات قبل مالحزب يتعمل...ايه الحل
فيه سناريوهات كتيرة نتكلم عليها بعدين
المهم منها فعص جمال سياسيا لو ماخدش المبادرة ولحق ينط علي رئاسة الحزب الوطني
واللي اظن محدش حيعارضوا في الوصول ليه
بس ساعتها فيه ناس حتدرك ان ساعة دخولها النعش جت
حتحاول تقاوم تتزلل لكن خلاص العجلة دارت وحتدوسهم
الغريب ان صفوت الشريف اللي حيوافق علي تاسيس الحزب كونه رئيس لجنة تعذيب الاحزاب حيكون اول ضحية ليه
حنقول ايه طباخ السم حيدوقه
وفي نهاية البرنامج احب اقرا برقية تهنئة
من جمال الي الحاج ابو علاء
العنوان وكالة الحاج جمال الصغير وكالة البلح ع الكورنيش
نعرفكم ان الخطة ماشية تمام والقزازة في البزازة
 والعاقبة عندكم في التوريثات


تحديث
........................
 جمال بيه خرج النهاردة وأكد ان المعلومات ده مغلوطه
وانه حييفضل في وكالة الوالد  عبد الغفور البرعي و لن ينشئ وكالة خردة خاصة
ونظرا لما يتمتع به ابن المعلم الكبير من مصداقية فنحن نصدقه
و مصدقين كمان انه مش حيورث الوكالة
أه نسيت اقلكم
علي فكرة وكالة البلح حيغيروا اسمها ويخلوها
وكالة القرع المباشر

هوامش :الصورة من مدونة عزبة الحاج ابو جمال