البيضة ولا الفرخة ....المسيحي ولا المسلم

سؤال غبي
مين الاول المسلم ولا المسيحي
اللي جه مصر الاول
اجابة بديهية
لا ده ولا ده
__
لسه فاكر وانا صغير عم الشيخ يقف ع المنبر
يجلجل بصوته
نحن لسنا ابناء الفراعنة
عليهم لعنة الله
بل نحن احفاد عمرو بن العاص
رضي الله عنه
_____
كنت في الكاتدرئية في العباسية بغطي مظاهرة للاقباط
ناس قالوا ان بنتهم خطفها واحد مسلم
و اتفرج ع الهتافات
عايزين و لادنا عايزين بلادنا
_______
المشهدين دول وان دلوا فانما يدلوا علي حالة
التغفيييييييييييييييل
الشديدة التي تعيشها مصر ما بين فكر ظلامي قادم من الشرق
و فكر تفرقي قادم من الغرب
يا سيدي احنا احفاد الفراعنة اللي قبل المسلمين والمسيحين
مصريون
منا من امن بالمسيحية
و منا من امن بالاسلام
لكننا في النهاية مصريون
حتي المزاوجة التي حدثت بين جيش عمرو بن العاص رضي الله عنه
و اهل مصر من القبط
انتجت مصريين
مش انا اللي بقول
علم الوراثة هو اللي بقول

لا المسحيين اخدوا الارض بوضع اليد
و لا المسلمين احتلوها

انا افخر اني مسلم و مصري و قبطي
و لعلم اخوانا الجهلة
كلمة قبطي معناها مصري
لما جاء اليونانين لمصر
سموا اهل مصر قبطا
للقماش الذي ينتجون ويلبسون
كل واحد حر في دينه
لا ده الاول ولا ده الاول
قبل دول مصر كانت موجودة
ولا اجد خيرا من كلام السميع العليم اذ يقول في كتابه العزيز
"... لتجدن اقربهم مودة للذين آمنوا الذين قالوا انا نصارى ذلك بأن منهم قسيسين ورهباناً وانهم لا يستكبرون "سورة المائدة .

و هذه الترنيمة
مبارك شعبي مصر ده وعدك من سنين

خيرك أكيد لأنك إله صادق أمين
(تيجي بغناك وتملا بيوت المحرومين

ويفيض النيل ويروي جموع العطشانين
صوت الحزن يسكت نرنم فرحانين

مبارك مبارك مبارك (مبارك)شعبي مصر

و قبل م امشي
الشعب هو للي مبارك مش حد تاني


1 HOME 1 PAIN

موسم صواني الكوسة بدأ....رجاء الدخول بالملاعق الرسمية

قبل التدوينة
قريت عند مراقب مصري ان د عبد الوهاب المسيري مريض
بالسرطان
و مستني احد امراء السعودية عشان يعالجوه
حسيت اني اتخنقت
و لان عيني لا تدمع
بكي قلبي
الف سلامة عليك يا استاذ يا محترم
الف مليون سلامة
و الف اتفوا ع اللي يسيب واحد بقيمة ده
و يروح يعالج ناس مش محتاجة فلوس عشان الموالسة لجناب النظام
استاذي
عفوا
لقد جئت في زمن الانذال
فسامحنا
فلا نملك لك الا الدعاء
...............................
اصعب ايام العام
تمر ثقيلة
لحظاتها دهور
ثوانيها منهكة
بانتظار القادم
المخيف
الذي طالما انتظرناه
لا حبا فيه
لكن وجلا منه
امتحانات اخر العام
حيث يتحول الطالب الي عين تقرأ
و مخ يحفظ ويفهم
و يد تكتب
اما الاهل
فلسان لاهج بالدعاء
و مفيش مانع لو كلمت جيرانكم كمان يدعولك مع ولادهم بالمرة
و برضه ميضرش لو كلمت بنت عمة امك من ام تانية عشان تدعيلك بالمرة
مهو الدعاء ببلاش وابو بلاش كتر منه
اكاد ازعم انه وقت الذروة في صعود الدعاء الي ابواب السماء-زي زحمة الساعة ثلاثة الظهر فوق كبري 6 اكتوبر –
........
لكن واحنا صغار ضحكوا علينا وقالوا يوم الامتحان يكرم المرأ او يهان
طبعا الكلام ده ينطبق علي الغلابة من امثالي و بعض منكم من اللي ملهومش واسطة-كلامي لكليات العملي و الكليات اللي فيها شفوي-
فزي مبيكون في الافلام الهابطة البطل متحاصر و حيموتوه الاشرار الوحشبن
فجاة
ييجي البوليس-بتاع الافلام طبعا- في لحظة حاسمة للقبض ع الاشرار
طالب دخل امتحانه مكتبش حاجة
لكن اذ فجاة يطلع ان البيه الصغير كلم الباشا الكبير ولده فاذ فجاة تانية نلاقي اللي مكتبش حاجة مرتب ع الدفعة
لكن هنا السؤال
مين البشاوات اللي يقدروا يعملوا كده
انا ميهمنيش الباشوت زوي المال والنفوذ
كلامي علي اساتذةالجامعة اللي المفروض كانوا زينا
المفروض مربيين اجيال
لكن
ولادهم اولي من الغريب في التعيين بالجامعة
منطق برضه
منطق غبي وسافل ودنئ
فهموني يا اخوانا و الكلام ده بيحصل في كليات مصر
طالب بيذاكر عشان مادة تحريري لكن فيه قبلها مادة عملي تانية قبل امتحان النظري
البشر الطبيعين حيذاكروا العملي
لكن لو كان معاك صك الغفران الابوي او الامي-نسبة للام –
تلاقي الامتحان العملي اللي دخلته من غير متذاكر و اللي مكتبتش فيه حاجة تجيب فيه امتياز
موقف تاني
و مش عاوز احلف انه حصل
زميلة اسمها اتوزع في الشفوي علي لجنة رئيسة القسم
و المعروفة بأسئلتها السهلة ودرجاتها العالية
لولاد الزملاء الاساتذة
دخلت الزميلة عندها لخطا في التوزيع
و بعد مراجعة اسم الزميلة من قبل الاستاذة الريسة
اكتشفت ان اسمها مش مع اولاد الدكاترة
فسألتها ايه اللي جابك هنا واعطتها من الاسئلة ما لذ وطاب
و النتيجة البنت اتعقدت من المادة
و لنفس الاستاذة
دخل احد الزملاء –من اصحاب صكوك الغفران-
فبعد السؤال علي حاله وعلي حال والده
سالتها اساله لا تسال لطالب في نهاية العام
فلما اجاب عنها لسهولتها
سالته
الله ما انت شاطر اهه امال متوصي عليك ليه
ابقي سلملي علي بابا!!!!!!!!!!!!!!!!

والذي رفع السماوات بغير عمد لتحاسبن حساب شديدا علي ظلمكم لنا
حسبي الله ونعم الوكيل
اللهم ارني فيهم عجائب قدرتك فلا املك من امري الا الدعاء عليهم

لقد اصبحت كلياتنا صينية كبيرة من الكوسة
يأكل منها الاساتذة
والباقي
لمن هم في مثل سننا
حاملي صكوك الغفران
او لنقل
اصحاب الملاعق الرسمية
الذهبية البراقة
اما نحن
فملاعقنا الخشبية لاتليق بهم
فلنا الله و كفي به وكيلا


مش كده ولا اييييييييييييييييه !!!!!!!!!!!

عن السفالة وقلة الادب في مصر...ثقافة سب الدين للمعارضة!!!

جلست امام التلفاز لاتابع مباراة في الدوري الاوروبي

الاقي فريق دخل فيه جون استنا الاقي الجمهور يقول زي مبيقول عندنا

لعيبة وسخة يا ولاد الوسخة ابداولا حتي يا

dirty players

ولا حتيson of pitc.....

ملهومش في قذارة اللسان وقلة الادب

لكن احناصرنا اساتذة سباب فمن سب بالنعوت-الاوصاف - انتقلنا الي نوع اخر

سب الاهل

ولم تتوقف المسيرة

عندما لم يكفنا الاهل

انتقلنا الي لعن الموتي

و استمرت المأساة فمن حركات بالايدي

وصلنا للمحظور الاكبر

سب الدين

و اصبحت ثقافة شعب عاجز

فشل انه يتجوز

فاتحرش

فشل انه يشتري شقة

فارتشا

و فشل انه يغير حياته للاحسن

فشتم

حرك لسانه

هذه القطعة من العضلات المغطاه بقليل من النسيج

التي تكب صاحبها علي وجهه في النار من حصادها

صارت سلاح المصري العاجز

فاطلق به نكته

و عندما صارت النكته من المحظورات

انتقل للسباب

مرغم

افالسب في حد ذاته يكون للاهانة

لكنه صار مادة للدعابة

و صار ابتكار السباب مزاجا لدي البعض

لكن لم الكل نظرته للسباب

فالشرطة لازالت علي عهدها به

اتحاول جاهدة اهانة من اتعسه الحظ بالوقوع تحت براثنهامن باب ان الشتيمة مبتلزقش

لكن

جت الطوبة في المعطوبة مع المدعو اسلام نبيل

شوف المفارقة اسلام لا وايه كمان نبيل

ما علينا

اهو رتبته صغيرة وشاب طايش والشيطان صايع

لكن توصل ان لواء شرطة يعني بنتكلم في حسبة 55 سنة كده

يسب الدين لايمن نورفكده مش عارف اقول ايه

هي الناس نسيت ان رب الدين اللي بيسبوه ده شايفهم

حيقولوله ايه يوم ميقفوا بين يديه للحساب

سبيت دينك يا رب

فين السادة الافاضل اللي كانوا حيولعوا في الدنيا عشان رسام مغمور في اخر الدنيارسم صور عبيطة لم يلتفت لها

احداحنا شهرناه وعرفنا الدنيا به و خلناه له سعر واسم وبقي بطل في نظر الغرب

عملناله قيمةمش ليه

و اكاد اقسم ان الموضوع بتاع الرسوم تم تصعيده- في التوقيت ده - لاسباب سياسية لا علاقة لها بالدين ولا حماية مناصحاب الفخامة والسمو والعلو وما يستجد من القاب رؤساء وملوك العرب

السباب صار ثقافة شعب وامة

ثقافة سافلةلن يمحوها الي استعادة الكرامة للمواطن

و التي بالتأكيد تهدر يوميا علي ابواب اقسام الشرطة

ربنا يفك حبسك يا نور
نص بلاغ ايمن نور ضد اللواء

مش كفاية كفاية (العدد الاول المصري افندي في الكلبش) مجلة

محتويات العدد

مش كفاية كفاية

فلاش

اجتماعيات 2012

احلام يقظة




للاتصال:
flklabsh@hotmail.com

موقع المدونة
Klabsh.blogspot.com





فلاش


- لا اراكم الله مكروها في اهلاويا لديكم
- العيب مش في اللعيبة العيب في عقدة الفانلة الصفراء (مشجع اسمعلاوي)
- السادة الشيوخ الافاضل اللي تفرغوا لرفع دعاوي قضائية ودعاوي حسبة وكل ده عشان يبانوا ويتشهروا اقولهم اتقوا الله و قبل متكفروا حد شوفوا اللي غرق 1300 بني ادم ولا اللي موت المئات في قطار الصعيد و حضراتك سكتم بكتم اكيد طبعا ده ناس كويسه وناس افاضل
- شيوخنا الافاضل اللي اصبحوا فاضيين للروايات والقصائد والجرائد احب اقول لحضراتكم ان خير الجهاد كلمة حق في وجه حاكم ظالم كفاية انبطحاية وهروب يا شيوخنا الافاضل
- نفسي اعرف ازاي شعب بيعاني من ازمة اقتصادية خانقة يوصل به الحال لدفع 150 جنيه لتذكرة مباراة الاهلي....السبب ان الشعب الغلبان مش هو اللي راح المباراة هو اللي بات قصاد النادي مستني التذكرة ام 25 جنيه طبعا لان كريمة الشباب طبعا هي اللي راحت عشان نشرف مصر قصاد العالم بدل الرعاع اللي بيشجعوا و يقفوا ورا فريقهم حتي وهو بيخسر....نادي بشاوات بصحيح
- حمادة كان قاعد مع جدو بيتفرج ع الماتش ورا الزجاج المضاد للصواريخ البالستية اللي في استاد القاهرة
عقبال ميقعد مع عمو جمال يتفرج برضه ورا الزجاج بعد اربع سنين طبعا يا ريس
- مبروك فيه سجن جديد بيتبني سعته 120 الف سجين.......بركاتك يا تعديلات
- مبروك عليك رئاسة فرنسا يا ساركوزي...عرفت منين؟؟؟؟....بالعقل هو 30% روايال 25 % ..بايرو 18...لوبان 11%..اصوات لوبان اليمين المتطرف مضمونه لساركوزي و حنقول ان بايرو لانه يمين الوسط ف1\3 الاصوات ع الاقل تروح لساركوزي ...مبروك تاني مرة يا ريس..ساركوزي
- نفس الرائحة العفنة التي ازكمت الانوف في 1975 تهب من لبنان..مناوشات في معسكرات اللاجئين الفلسطينين
مقتل شابين في منظقة نفوذ الحزب الاشتراكي التقدمي بزعامة وليد جنبلاط
نفس المقدمات تتجه لتكرار المأساة والمعارك و الثلاثاء الاسود
الجديد دخول وليد جنبلاط من البداية لا كالمرة الماضيةبعد اغتيال والده كمال
و دخول حزب الله الملعب بثقله
حزب الله من ناحيته يحاول اشعال حرب جديدة مع اسرائيل بوضع صورة كبيرة للعسكريين الاسرائليين المختطفين من قبل حرب 2006
ارحموا لبنان وارحمونا




حوليات تفصيل الكستور
الحلقة الرابعة والاخيرة
مش كفاية كفاية

و لماذا الحديث عن كفاية؟
لان كفاية هي القوة الاكثر فاعلية و قبولا شعبيا من الشعب عن احزاب العظام النخره
اود انني- و لو اني لست كفايويا- الا اني اري انها الامل للحراك بعد سبات ابي الهول الذي نعيشه
لقد حققت هذه الحركة حراكا لم يكن متوقعا
بدأت الحركة بهدف واحد
انهاء حكم مبارك و منع التوريث
و رغم انه لا هذا ولا ذاك قد تم منعه
الا ان الحراك الذي قامت به كفاية في وقت قصير في عمر الحركات المعارضة عالميا جدير بأن نتاملها و نمحص في اسباب بداية دب الضعف فيها
فالحركة تنتحر داخليا
و من لا يعترف بالازمة الحالية اما جاهل و اما جاحد
و اود ان اوضح انني لا انتقد اشخاص ولكن انتقد مواقف وتصرفات
و الموضوع لا يتعد عين مراقب و محلل لاحداث
و اسمحوا لي ان ابدأ مباشرة بالتعديلات الدستورية لانني لست بمعرض تأريخ لكفاية
كفاية وغيرها كانوا علي علم بالتعديلات قبلها بفترة
و لم تتحرك كغيرها..ربما هي عادتنا المصرية في الحركة عندما يبدأ القطار في مغادرة المحطة..ربما
بداية انهياركفاية جائت عندما خرجت اصوات مطالبة بتنحي جورج اسحق عن مقعد المنسق العام والذي شغله منذ بداية الحركة
و علي الرغم من شهادة الجميع لجورج اسحق بالدينامكية
الا ان هذا لم يشفع له للاستمرار في منصبه
و جاء رد فعل عنيف بخروج عدد من القيادات المؤسسة للحركة اهمهم النائب الصعيدي السابق
(جمال اسعد)
وهذا شاهد اول علي الازمة
و كان لابد من التغيير
فاتوا بالدكتور الرائع عبدالوهاب المسيري
و لا خلاف عليه
فالرجل يحظي بمحبة الجميع و له رأي حر
وو تتلمذ علي يديه وعلي كتباته كل مثقفي هذا الجيل(و انا اولهم)
فالرجل يمثل قيمة رائعة وغالية لدي جموع المثقفين والمشتغلين بالسياسة
ولكن
دكتور عبد الوهاب لا يصلح ليقود الناس في الشارع
فلقد سقطت قلوب جميع المصريين في اقدامهم عند رؤية الدكتور عبد الوهاب في المظاهرة امام حزب التجمع والتي-و قد ستر الله من عنده- كاد ان يداس فيها باقدام عساكر الامن المركزي و الذين لو عرفوا قيمة الرجل لحملوه فوق رؤوسهم…ما علينا
و ربما كان هذا سبب الاختيار فالرجل بما يمثل من قيمة علمية وادبيه يفخر كل مصري بها
الا انه النقيض التام في العمل السياسي من جورج اسحق وربما كان هذا السبب في اختياره
لقد ارادوا البرهنه انه لا يملأ فراغ اسحق الا هو
و قد اكد لي البعض ولكنني لم اتاكد من مصدر مستقل ان جورج اسحق اطلق اشاعة انه قد تم اختطافه ليلة التعديلات الدستورية
هذا شاهد ثاني علي ازمة كفاية
الشاهد الثالث هو موقف شباب مجموعة 30 فبراير مثل علاء ووائل عباس
والذي خالف توجيهات كفاية بمقاطعة الاستفتاء
و قالوا كفي سلبية اذهبوا وقولوا لا
و قد وضحت في الحلقة السابقة من هذه السلسلة رايي في هذا التوجه
و المؤشر الرابع والاخير علي ازمة كفاية هو الموقف المائع الذي اتخذته كفاية علي لسان جورج اسحق-و الذي لو لاحظتم عاد للظهور من جديد في المؤتمرات والمظاهرة التي كانت اما نقابة الصحفيين يوم الاستفتاء- و كان الموقف هو توعية الناس- بعد اقرار التعديلات- بمخاطر هذه التعديلات واثرها السئ…يا سلام
المشكلة في كفاية هي هراركية اتخاذ القرار والذي متعدد الرؤس
Multi headral system of decision making hierarchy
المهم ان هذه كلها مؤشرات خطيرة لكفاية تدل انها تعيش ازمة منتصف العمر للتنظيمات السياسية
المشكلة في كفاية انها نشات كحركة احتجاجية فقط
بلا برامج لمرحلة ما بعد تحقيق طموحاتها ان حققت
و اذ فجأة صار الاحتجاج حلما للمحرومين
وهذا وضع مسؤليات جديدة علي عاتقها
و اصبحت كلمة كفاية رعبا للنظام
و لكن في المقابل صارت كل جماعة بما لديهم فرحون
ظهرت التوازنات والتكتلات داخل كفاية
كل اصبح له شله وتنظيم له الاولية علي الحركة
فهل هذا مؤشر علي خريف كفاية ؟؟؟؟
ادعوا الله ليخيب ظني ويظهر الربيع الكفايواي من جديد
امين




اجتماعيات

ركبت الة الزمن اللي راكنهاتحت البيت
و قلت اطلع علي 2012 اشوف ايه اللي جري
اول حاجة لفتت نظري اني لا لقيت الفجر ولا الدستور ولا حتي المصري اليوم
قلت يمكن حال ادنيا انصلح
رحت مشتري الاهرام اهو اشوف ايه اللي جري في الدنيا
و اطمنكم ان مصر لسه موصلتش كاس العالم ولا حسام حسن اعتزل
بس فيه كام صورة شفتهم ربنا مايوريكم
هام :لاحظوا التاريخ في الصورة الاولي










بصراحة لما شفت كده قلت ارجع و اقولكم وابسكم بالمستقبل الرائع

ملحوظة:الصور-بجد- من الاهرام لهذا الاسبوع فيها لعب علي خفيف اوي
بس بجد عاوز اعرف ده لو مش صور رئيس تبقي صور ايه
التوريث كاس ومكتوب علي كل الناس



احلام يقظة

تم قطع المياه عنا لان
الماسورة انفجرت
و نظرا لانني و سيادة الريس نتفق في محطة مياه واحدة
فلقد ظننت وبعض الظن اثم ان سيادته المياه قطعت عن بيته سيادته
تخيلت سيادته وهو يا عيني لا بس البيجامة و لابس شبشبه ونازل و في ايده جركن مياه عشان يملا من محطة البنزين ولا الجامع اللي جنب نادي هليوبلس
و تخيلت معاناة سيادته وهو رايح واقف في الطابور مع الشعب ليملأ الماء او ليشتري زجاجات المياه المعدنية زي عامة الشعب
طبعا لان سيادته حاسس بمعاناة الشعب الغلبان
اللي مش لاقي الصرف اصلا
و لا معاه فلوس يجيب المياه المعدنية
منها لله جاأت المصري اليوم صحتني من الحلم اليوتويبي ده
و طمنتني علي سيادته
المياه لم تقطع عن قصر الرياسه
حتي في المياه في خيار و فاقوس

محمود شاكيرا و مستر ايجيبت....اشكالية النخاسة و الخنوثه

كانه مش كفاية علينا الوكسة السنوية اللي اسمها( مس ايجبت) اللي بناتنا يطلعوا في سوق النخاسة قصاد اساتذة افاضل يقيموا مين احلي من التانية ومين ملفوفة القوام اكثر من التانية.....شئ مقزز ومقرف كل سنة...لكن حنقول اه بنات طقه اما اهلها مربوهاش او هي اللي صوتها من دماغها....مش قادر افهم ازاي واحدة تقبل تلبس اللبس الخليع و تقف قصاد رجالة يتفرجوا عليها
لكن اللي مش قادر افهمه ازاي راجل طول بعرض يقبل علي نفسه كده؟؟؟؟؟؟
أبص الاقي ان فيه كارثه طلعت اسمها (مستر ايجيبت)..يا نهار اسود وصلت لكده..اه يا بلد الفراعنة...و يقولوا في الاغاني رجالة و طول عمر ولادك يا بلدنا رجالة....ههههه راحت عليكي يا مصر
البهاوات كل واحد ملبسينه بادي و خارج علينا مسبل عينيه
و يقول سنه و بيحب ايه و في الاخر
VOTE FOR ME
لا و ايه طول بعرض و في الاخر طالع كده
رغم عدم حبي لعبدالناصر لكن سمعت انه كان ايامه اقامت مجلة مسابقة لاجمل عيون فاذ بالشباب يرسلون صورهم وكل واحد منهم قد سبل عينيه...فما كان من عبد الناصر اللا ان امر بالاتيان بهؤلاء الشبان و حلق شعرهم علي الزيرو !!!!!!!!
مش قادر اعرف فين نخوة الرجل لما بقف قصاد الناس تتفرج عليه....هو اللي بيجري مبقاش دم بقي ايه....بيبسي –ولا بلاش عشان المقاطعة –نخليها مكة كولا و ساقعة كمان.
لا واستنوا و ما تزعلوش ع الرجولة المفقودة...نلاقي مكتوب في الجرايد عن واحد اسمه محمود شاكيرا وبيشتغل راقصة بلدي......اسف راقص بلدي...يلبس الجلبية و يرقص بالعصاية....لا و فوق كل ده عندها....قصدي عنده (شنب)
حجته في هذا ان الارتفاع في الوعي الديني خلا الناس متشوفش الراقصات لمجونهم وخلاعتهم فعشان كده هو بيرقص -كتر خيره- عشان الفن و الرقص مش للاثارة
و هو الدين قالك يا بني ادم ترقص و تتقصع قصاد الناس
ضيعتوا الدين و ضيعتوا الدنيا جاتكم القرف.....
هي ده الحقيقة يا اخوانا مصر تعيش ازمة رجولة و الفرق بين الذكورة والرجولة واضح.
ليه؟؟؟ لان الرجل اللي يقول كلمة الحق ييتراقب و ييتسجن
اما اللي يهز وسطه و يلبس البادي و يقول
VOTE FOR ME
 هو ده اللي يعجب و يعيش في البلد معزز مكرم
الله يرحمك يا رجولة الله يرحمك يا كرامة الله يرحمك يا دم
ياللي حتي الاكياس اللي كانت شيلاك طلعت بايظة
و نظرا ان البعبع اللي في البلد دلوقتي هو المدونون
احب تشوفوا الكاركتير ده



لقراءة التعليقات علي موقع
dvd4arab
اضغط هنا